ރާއްޖޭގައި ހިންގޭ އުމުރާނީ ތަރައްޤީގެ އެންމެ ބޮޑު މަޝްރޫޢު ކަމުަގައިވާ ގްރޭޓާ މާލެ ކަނެކްޓްވިޓޫ ބްރިޖުގެ މަސައްކަތް ނިންމުމަށް މިހާރު ކަނޑައަޅާފައިވާ ތާރީޚަކީ، 30 ސެޕްޓެމްބަރ 2026 ކަމުގައި ސަރުކާރުން ބުނެފިއެވެ.

ބްރިޖުގެ މަސައްކަތްތަކާއި ގުޅޭ ގޮތުން މީޑިއާތަަކަށް މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުުމުގައި، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބު ވިދާޅުވީ، ކުރީ ސަރުކާރުގެ ދައުރުހަމަވުމުގެ އެއްދުވަސް ކުރިން، ބުރިޖުގެ މަސައްކަތުގެ މުއްދަތު އިތުރުކޮށް އެއްބަސްވުން އާކޮށްފައިވާ ކަމަށެވެ. މިގޮތުން އެއްބަސްވުމުގެ މުއްދަތު 2026 ސެޕްޓެމްބަރު މަހުގެ 30 ވަނަ ދުވަހާއި ހަމައަށް އިތުރުކޮށްދީފައި ވަނީ މި ނޮވެމްބަރު މަހުގެ 16 ވަނަ ދުވަހުގައި ކަމަށް މުއްޠަލިބް ވިދާޅުވިއެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަނީ، އެމަނިކުފާނުގެ ކެބިނެޓްގައި ހިމެނޭ ހުރިހާ ވަޒީރު ބޭފުޅުންނާއި އެކު އިއްޔެ ބްރިޖުގެ މަސައްކަތްތައް ހިނގާ ސައިޓްތަކަށް ޒިޔާރަތްކުރައްވާފައެވެ. 

ކުރީ ސަރުކާރުގެ އެންމެ ބޮޑު ޕްރޮޖެކްޓްކަމުގައިވާ، ގުރޭޓާ މާލެ ކަނެކްޓިވިޓީ ބްރިޖްގެ މަސައްކަތް ހުސްވި އަހަރުގެ އޮގަސްޓް މަހާއި ހަމައަށް ކަނޑައެޅިފައިވާ ތާވަލާއި އެއްގޮތަށް ކުރިޔަށް ގޮސްފައިވާ ކަމުގައިވެސް ސަރުކާރުން ވަނީ ބުނެފައެވެ.

ގްރޭޓަރ މާލެ ކަނެކްޓިވިޓީ މަޝްރޫޢުގެ ތެރޭގައި ހިމެނެނީ، މާލެ އާއި ވިިލިމާލެ، ވިލިމާލެ އާއި ގުޅީފަޅު، އަދި ގުޅީފަޅާއި ތިލަފުށި ބްރިޖްތަކަކުން ގުޅާލުމާއި، މިބްރިޖްތަކާއި ގުޅޭ، މަގުތައް ހެދުމެވެ. މިމަޝްރޫޢުއަކީ އިންޑިއާގެ އެގްޒިމްބޭންކުންދޭ 400 މިލިއަން ޑޮލަރުގެ ލައިން އޮފް ކުރެޑިޓާއި އިންޑިއާ ސަރުކާރުންދޭ 100 މިލިއަން ޑޮލަރުގެ ހިލޭ އެހީގައި ހިންގާ މަޝްރޫޢުއެކެވެ. މިމަޝްރޫޢުގެ މަސައްކަތް ހަވާލުކޮށްފައި ވަނީ އެފްކޮންސް އިންފްރާސްޓްރަކްޗަރ ލިމިޓެޑާއެވެ.