ނިމި ދިޔަ ސަރުކާރުން ފަށާފައިވާ ތަރައްޤިގެ އެންމެ ބޮޑު މަޝްރޫޢު ކަމުގައިވާ، ގްރޭޓާ މާލެ ކަނެކްޓިވިޓީ ބްރިޖްގެ މަސައްކަތް ކުރިޔަށް ދާގޮތް ރައިސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ބައްލަވާލައްވައިފިއެވެ.

ބްރިޖުގެ މަސައްކަތްތައް ކުރިއަށްދާ ސަރަޙައްދުތަކަށް ރައީސުލްޖުމްހޫރިއްޔާ މިއަދު ހަވީރު ކުރެއްވި ޒިޔާރަތުގައި އެމަނިކުފާނުގެ އަރިހުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި ވަޒީރުންގެ މަޖިލީހުގައި ހިމެނިވަޑައިގަންނަވާ ބައެއް މެމްބަރުން ބައިވެރިވިއެވެ.

ރައީސުލްޖުމްހޫރިއްޔާގެ މިޒިޔާރަތުގައި އެންމެ ފުރަތަމަ ވަޑައިގެންނެވީ، ގްރޭޓަރ މާލެ ކަނެކްޓިވިޓީ ބްރިޖްގެ މާލޭ ޕްރޮޖެކްޓް ސައިޓަށެވެ. އޭގެފަހުން ވިލިގިލި ސައިޓަށާއި އަދި ގުޅީފަޅުގައި، ބުރިޖުގެ ޕްރީކާސްޓިންގ މަސައްކަތްތައް ކުރިޔަށް ގެންދާ ސައިޓަށްވެސް ރައީސުލްޖުމްހޫރިއްޔާ ވަޑައިގެންނެވިއެވެ. 

މިހަފްތާގައި، ނޫސްވެރިންނަށް މައުލޫމާތު ދެއްވަމުން ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް ވިދާޅުވެފައި ވަނީ، ބުރިޖުގެ މަސައްކަތުން މިހާތަނަށް ނިމިފައި ވަނީ، %27 މަސައްކަތް ކަމަށެވެ. 

ރައީސުލްޖުމްހޫރިއްޔާ ޑޮކްޓަރ މުޢިއްޒު މީގެ ކުރިން ވަނީ، "ގްރޭޓާ މާލެ ކަނެކްޓިވިޓީ – މާލެ ޓު ތިލަފުށި ލިންކް ޕްރޮޖެކްޓް"ގެ މަސައްކަތްތައް ނުނިމި ލަސްވަމުންދާ ސަބަބުތައް ހޯއްދަވައި، ބްރިޖުގެ މަސައްކަތްތައް ވީހާވެސް އަވަސް ސްޕީޑެއްގައި ނިންމެވުމަށް މަސައްކަތް ކުރައްވާނެކަމުގައި ވިދާޅުވެފައެވެ.