2024 ވަނަ އަހަރުގެ ބަޖެޓަކީ ކުރީ ސަރުކާރުން ހުށަހެޅި ބަޖެޓެއް ނަމަވެސް، އެ ބަޖެޓުގެ ތެރެއިން އާ ސަރުކާރުގެ ވައުދުތައް ފުއްދަން ފަށައިގަނެވޭނެ ކަމަށް މުއިއްޒު ސަރުކާރުގެ ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެއެވެ. އޭނާ މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުންނެވެ. 

މިނިސްޓަރ ޑރ. ޝަފީގު ވިދާޅުވީ، އަންނަ އަހަރުގެ ބަޖެޓުގައި ޕީއެސްއައިޕީއަށް 458 މަޝްރޫއުއަކަށް 1.5 ބިލިއަން ރުފިޔާ މިހާރުގެ ސަރުކާރުން ހިމަނާފައިވާ ކަމަށެވެ. އޭގެ ތެރެއިން ސަރުކާރުން ވެފައިވާ ވައުދުތައް ފުއްދަން ފެށޭނެ ކަމަށް އޭނާ ވިދާޅުވިއެވެ.

ޝަފީގު ވިދާޅުވީ، ސަރުކާރުގެ އަމާޒަކީ، މިހާރު ކުރިއަށްދާ މަޝްރޫއުތައް ވެސް ނުހުއްޓި ކުރިއަށް ގެންދެވޭނެ ގޮތްތަކަށް ހޯދައިގެން ކުރިއަށް ދިއުމަށެވެ. ނަމަވެސް، މިއަހަރުގެ ބާކީ ދުވަސްތަކުގައި ކޭޝްފްލޯގެ ތާށިކަން އޮންނާނެ ކަމަށް ވިދާޅުވިއެވެ.

Advertisement

"ފިސްކަލް އަދި ދަރަނީގެ ދެމެހެއްޓެނިވިކަން ކަށަވަރު ކުރުމަށްޓަކައި ދައުލަތުގެ ހަރަދާއި ފައިނޭންސް ހޯދަން ޖެހޭ މިންވަރު ކުޑަކުރަންޖެހޭ އިރު ހަރަދު ކުޑަކުރުމަށް އަޅަންޖެހޭ ފިޔަވަޅުތައް ތަންފީޒު ކުރުމަކީ މުހިއްމު ކަމެއް ކަމުގައި ދެކެން،" މިނިސްޓަރ ވިދާޅުވިއެވެ.

އަންނަ އަހަރަށް ފާސްކޮށްފައިވަނީ 49.6 ބިލިއަން ރުފިޔާގެ ބަޖެޓެކެވެ. ފިނޭންސް މިނިސްޓަރ ވިދާޅުވީ، ހަރަދު ކުޑަކުރުމަށް މައިގަނޑު 3 ކަމެއް ބަޖެޓްގައި ހިމަނާފައިވާކަމަށެވެ. އެއީ އިންޑައިރެކްޓް ބައެއް ސަބްސިޑީތައް ސަރުކާރުގެ އެހީތެރިކަމަށް އެންމެ ބޭނުންޖެހިފައިވާ ފަރާތްތަކަށް ހާއްސަކުރެވޭގޮތައް ޑައިރެކްޓް ސަބްސިޑީއަކަށް ބަދަލުކުރުރުމާއި، އާސަންދައިގެ ނިޒާމު ހަރުދަނާކޮށް މުރާޖާކުރުމުގެ އިތުރުން ސަރުކާރުގެ ވެލްފެއަރގެ ގޮތުގައި ހަރަދުކުރާގޮތް ހަރުދަނާކުރުމެވެ.

އިޤްތިޞާދު ކުރިއެރުވުމަށް ކުރާނެ ކަންތައްތަކުގެ ތެރޭގައި އަންނަ އަހަރު އެންމެ މުހިންމު އިސްކަމެއް ދެއްވައިގެން ކުރާނެކަމަކީ ވެލާނާ އިންޓަނޭޝަނަލް އެއަރޕޯޓްގެ އައު ޓާމިނަލް ނިންމުންކަން މިނިސްޓަރ ވަނީ ވިދާޅުވެފައެވެ.