ހުޅުމާލޭގައި އިމާރާތްކުރަމުންދާ ކޭ-ޕާކް ރެސިޑެންސްގެ ފްލެޓްތައް ވިއްކުމުގައި މަކަރާއި ހީލަތް ހަދާފައިވާ މައްސަލައިގައި ތުހުމަތު ކުރެވޭ މީހުން ދިރިއުޅޭ ތަންތަން ބަލައި ފާސްކުރަން ފަށާފައިވާ ކަމުގައި ފުލުހުން ބުނެފިއެވެ.

ފުލުހުންގެ އިދާރާއިން ބުނީ، އެމައްސަލައާ ގުޅުން ހުރި މީހުންނާއި ގުޅުންހުރި ތަންތަން ބަލައި ފާސްކުރުމުގެ މަސައްކަތް ފުލުހުން ކުރަމުންދާކަމުގައި ބުނުން ފިޔަވައި އިތުރު މައުލޫމާތެއް ފުލުހުން ހާމައެއް ނުކުރެއެވެ. އެކަމަކު އެނގިފައިވާ ގޮތުގައި ފުލުހުން މިއަދު ބަލައި ފާސްކޮށްފައި ވަނީ، ކޭޕާކު ފްލެޓްތައް އަޅާ ހަމްބޯ ކޮމްޕެނީގެ އެއް ޙިއްޞާދާރު ކަމުގައިވާ ޙަސަން މަންދޫހު (މަންޑޭ) އާ ގުޅުން ހުރިތަނެކެވެ.

އޮޅުވާލައިގެން ފްލެޓްތައް ނުއަގުގައި ވިއްކާފައިވާ ކަމަށް ބުނެ ހަމްބޯކުންފުނިން ވަނީ މަމްދޫހުގެ މައްޗަށް ބޮޑެތި ތުހުމަތުތަކެއްކޮށް އޭނާގެ މައްސަލަ ފުލުހުންނަށްވެސް ހުށައަޅާފައެވެ. އެމައްސަލަ އާއި ގުޅިގެން މަންޑޭއަށް ރާއްޖެއިން ފުރައިގެން ނުދެވޭ ގޮތަށް އޮތީ އޭނާގެ ޕާސްޕޯޓުވެސް ހިފަހައްޓާފައެވެ.