ކުރީގެ ގަޑިބުރު ޒަމާނީ ފަރުމާއަށް ތަރައްޤީކޮށް، އަލުން އިފްތިތާހުކޮށްފިއެވެ. ގަޑިބުރު އަލުން އިފްތިތާހުކޮށްދެއްވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއެވެ. ގަޑިބުރު އަލުން އިމާރާތް ކުރުމުގެ މަސައްކަތް ކުރީ ޕައިނިއާރސް މޯލްޑިވްސްގެ ފަރާތުންނެވެ. 

ގަޑިބުރު އަލުން އިމާރާތްކޮށް ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، މިއީ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމެނޭކަމެއްކަމަށެވެ. ކުރީގެ ގަޑިހުރި ކޮންސެޕްޓްގައި ޒަމާނީ ގޮތެއް ގެނެސް ޑިޖިޓަލައިޒްކޮށް އަލުން މި ގަޑިބުރު އިމާރާތްކޮށް ހުޅުވޭއިރު މިއީ ހުރިހައި އުމުރުފުރާއެއްގެ މީހުންނަށްވެސް ބޭނުންތެރި ބިނާއަކަށް ވެގެންދާނެކަމަށް ރައީސް ވިދާޅުވިއެވެ.  އަދި މާލޭގައި ހުރި މިފަދަ އެހެން ބިނާތައްވެސް ޒަމާނާއި އެއްގޮތައް އެތަންތަނަށް އާރޯކަން ގެނެސްދެއްވާނެކަމަށް ރައީސް ޑރ. މުއިއްޒު ވަނީ ވިދާޅުވެފައެވެ.

"އަޅުގަނޑު ދެންނެވީ ކުރީގައި މިތަނުގައި ގަޑި ހުރި ކޮންސެޕްޓްގައި އެ ޑިޒައިނާއި އެއްގޮތްވާގޮތައް އަދި ޒަމާނީ ގޮތެއްވެސް އެއަށްގެނެސް ޑިޖިޓަލައިޒް ކުރުމުގެ ވިސްނުން އެއަށް ގެނެސްގެން ގަޑިބުރު ހަދައިދެއްވާށޭ. މީގެބޭނުމަކީ ޒުވާނުންނަށްވެސް އަދި ޅަފުރައިގެ ކުދިންނަށްވެސް ޖުމްލަކޮށް ހުރިހައި ފަރާތްތަކަށްވެސް މަޤްބޫލު ވިސްނުންތަކެއްވެސް މިއަށް ގެނައުން. އަދި 5 ވަގުތު ބަންގިވެސް ގޮވޭގޮތައް ހަމަޖެހިފައި މިއޮތީ. މުހިންމު މެސެޖްތައްވެސް ޑިޖިޓަލް ސްކްރީނަށް އެރުވޭގޮތައް." ރައީސް މުއިއްޒު ވިދާޅުވިއެވެ.

މިގަޑިބުރު ހުންނަނީ އޯކިޑްމަގާއި، ފަރީދީ މަގާއި ފަނޑިޔާރުމަގު ގުޅޭ ކަންމަތީގައެވެ. މާފަންނު ގަޑިބުރަކީ ރާއްޖޭގެ މިނިވަންކަމަށް 25 އަހަރު ފުރުނު މުނާސަބަތާއި ގުޅުވައިގެން ލަންކާއިން ރާއްޖެއަށް ހަދިޔާކުރި ގަޑި ބެހެއްޓި ތަނެވެ.

މި ބިނާ އަލުން ފަރުމާކޮށް ހުޅުވާފައިވަނީ ޒަމާނުގެ ރަމްޒެއްގެ ގޮތުގައި ހިމެނޭ 4 ގަޑި ހިމަނައިގެންނެވެ. އަދި ފަރުޟު 5 ނަމާދުގެ ބަންގީގެ އަޑު ގަޑިން ގަޑިއަށް ހިތްހަމަޖެހުމާއިއެކު މި ބިނާއިން އިވޭނެއެވެ. 

މީގެ ކުރިން ދެ ފަހަރެއްގެ މަތިން ގަޑިބުރު ތަޅާލާ މަރާމާތުކުރިއެވެ. މިގޮތުން 2016 ވަނަ އަހަރުގެ ފަހުކޮޅު ގަޑިބުރު ތަޅާލާ އޭރުގެ ސަރުކާރުން އެތަން މަރާމާތުކުރިއެވެ. އަނެއްކާގެ އޭގެ ފަހުން 2017 ވަނަ އަހަރުގެ ޖުލައިމަހުވެސް އެތަން ތަޅާލާ އަލުން ވަނީ މަރާމާތުކޮށްފައެވެ.