ސައުތު އެފްރިކާގެ ހައްދަކީ މިއީބާއެވެ؟

ސައުތު އެފްރިކާއިން ކްރިކެޓް ވޯލްޑް ކަޕްގައި 9 ފަހަރު ކުޅެފައިވާއިރު، އެ ޓީމު ވަނީ 5 މުބާރާތުގެ ސެމީއަށް ދަތުރު ކޮށްފައެވެ. ނަމަވެސް، މިއިން އެއްވެސް ސެމީ ފައިނަލް މެޗެއް އަދި އެ ޓީމަށް ކާމިޔާބު ކުރެވިފައެއް ނެތެވެ.

ބުރާސްފަތި ދުވަހު ސައުތު އެފްރިކާ ނިކުތީ ކްރިކެޓް ވޯލްޑްކަޕްގެ އެންމެ ކާމިޔާބު ޓީމުކަމުގައިވާ އޮސްޓްރޭލިއާ އާ ދެކޮޅަށެވެ. އެމީހުން ވަނީ މި މުބާރާތް 5 ފަހަރު ކާމިޔާބު ކޮށްފައެވެ. ނަމަވެސް އޮސްޓްރޭލިއާ އަތުން 3 ވިކެޓުން ބަލިވެ، ސައުތު އެފްރިކާ އަނެއްކާވެސް މިވަނީ ފައިނަލަށް ނުދެވި މުބާރާތުން ކަޓައިފައެވެ.

Advertisement

މެޗުގެ ފުރަތަމަ އިނިންގްސްގައި ކުޅެން ނިކުތީ ސައުތު އެފްރިކާއިންނެވެ. އޮސްޓްރޭލިއާގެ ބޯލަރުން ސައުތު އެފްރިކާގެ ކުޅުންތެރިންނަށް ރަގަޅު ސްކޯއެއް ހެދޭނެ މާ ބޮޑު ފުރުސަތެއް ނުދިން ނަމަވެސް، ޑޭވިޑް މިލާގެ ސެންޗަރީއިން ސައުތު އެފްރިކާ ނިންމާލީ އެންމެން ނުބައިވެ 212 ލަނޑު ހަދައިގެންނެވެ. މިލާ ވަނީ މި މެޗުގައި 116 ބޯޅައިން 101 ލަނޑު ހަދާފައެވެ.

ދެވަނަ އިނިންގްސްގައި އޮސްޓްރޭލިއާ މެޗު ކާމިޔާބު ކުރުމަށް 213 ލަނޑު ހަދަންޖެހުނު އިރު، މިއީ 1999 ވަނަ އަހަރުގެ ވޯލްޑް ކަޕް ސެމީ ފައިނަލްގައި މި ދެ ޓީމު ބައްދަލު ކުރި މެޗުގައި ވެސް މެޗު ކާމިޔާބު ކުރުމަށް އޮސްޓްރޭލިއާއަށް ހަދަން ޖެހުނު ލަނޑުގެ އަދަދެވެ.

އޮސްޓްރޭލިއާއިން 7 ކުޅުންތެރިން ނުބައިވެގެން 213 ލަނޑު ހަމަކުރިއިރު، 50 އޯވަރު ހަމަވުމަށް ބާކީ 16 ބޯޅަ އޮތެވެ.

މުބާރާތުގެ ފައިނަލް ގައި މި އަންނަ އާދީއްތަ ދުވަހު އޮސްޓެރޭލިއާ ބައްދަލު ކުރާނީ މުބާރާތް ބާއްވާ ގައުމު، އިންޑިއާ އާ ދެކޮޅަށެވެ. އިންޑިއާއިން ވަނީ މި މުބާރާތް 2 ފަހަރު ކާމިޔާބުކޮށްފައެވެ.