ގެދޮރުވެރިޔާ ސްކީމުގެ ދަށުން ސަރުކާރުން ހުޅުވާލި 4000 ފްލެޓު ލިބޭ ފަރާތްތަކުގެ ދާއިމީ ލިސްޓު މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އާންމުކުރައްވައިފިއެވެ. މި ލިސްޓު އާންމުކޮށްފައިވަނީ ދާއިމީ ލިސްޓަށް ހުށަހެޅުނު ޝަކުވާތައް ބެލުމަށްފަހުގައެވެ. 

ހުޅުމާލޭ ދެވަނަ ފިޔަވަހީގައި ތަރައްޤީކުރަމުންދާ މި ފްލެޓްތައް ލިބޭ ފަރާތްތަކުގެ ދާއިމީ ލިސްޓު އެންމެ ފުރަތަމަ ޕްލޭނިންގ މިނިސްޓްރީން އާންމުކުރެއްވީ މިމަހުގެ 4 ވަނަ ދުވަހުއެވެ. އެހެންނަމަވެސް ލިސްޓު އާންމު ކުރުމާއެކު ޕޮއިންޓު ލިބިފައި ހުރި ގޮތާ މެދު އާންމުންގެ ބޮޑެތި ކަންބޮޑުވުންތަކަކާއި، އެކި ކަހަލަ ތުޙުމަތުތަކާއި ޝަކުވާތައް ހުރުމުން ޝަކުވާ ހުށަހެޅުމުގެ ފުރުޞަތު މިމަހުގެ 5 އިން ފެށިގެން 10 އަކަށް ގެދޮރުވެރިން ޕޯޓަލް މެދުވެރިކޮށް ހުޅުވާލިއެވެ. މި މުއްދަތުގެ ތެރޭގައި ޝަކުވާގެ ގޮތުގައި 7521 ޝަކުވާ ހުށަހަޅާފައިވެއެވެ.

ޕްލޭނިންގ މިނިސްޓްރީން ވިދާޅުވީ، ފްލެޓް ލިބޭ ފަރާތްތަކުގެ ދާއިމީ ލިސްޓު އާންމުކޮށްފައިވަނީ ޝަކުވާ ހުށަހެޅުމަށް ހުޅުވާލި ފުރުޞަތުގައި ހުށަހަޅާފައިވާ ޝަކުވާގެ މައްޗަށް އިޔާއަތްކޮށް ބެލުމަށްފަހުކަމަށެވެ. މި ލިސްޓު މިހާރު ވަނީ ދިވެހި ސަރުކާރުގެ ގެޒެޓުގައި ޝާޢިއުކުރައްވާފައެވެ. އެގޮތުން ލިސްޓަށް އައިސްފައިވާ ބަދަލުތަކާއެކު ފުރަތަމަ ބުރުގައި 3 ކޮޓަރީގެ ފްލެޓް ލިބެނީ 76 އިން ފެށިގެން މަތިން މާކްސް ލިބިފައިވާ ފަރާތްތަކަށް ފްލެޓް ނެގުމަށްފަހު ބާކީވާ ފްލެޓްތައް 75 މާކްސް ލިބިފައިވާ ފަރާތްތަކުގެ ތެރެއިން ގުރުއަތުން ހޮވޭ ފަރާތްތަކަށްކަމަށް ޕްލޭނިންގ މިނިސްޓްރީން ވިދާޅުވެއެވެ. އަދި ފުރަތަމަ ބުރުގައި 2 ކޮޓަރީގެ ފްލެޓް ލިބެނީ 73 އިން ފެށިގެން މަތިން މާކްސް ލިބިފައިވާ ފަރާތްތަކަށްކަމަށްވެސް އެ މިނިސްޓްރީން ވިދާޅުވެއެވެ.

3 ކޮޓަރީގެ ފްލެޓްތަކުގެ މަހު ކުއްޔަކީ 7000 ރުފިޔާއާއި މަރާމާތު ފީގެ ގޮތުގައި މަހަކު 1000 ރުފިޔާއެވެ. އަދި 2 ކޮޓަރީގެ ފްލެޓްތަކުގެ މަހު ކުއްޔަކީ 5000 ރުފިޔާއާއި މަރާމާތު ފީގެގޮތުގައި މަހަކު 1000 ރުފިޔާއެވެ. މި ފްލެޓްތަކަށް ކުލި ދެއްކުމަށް ފެށުމަށް ހަމަޖެހިފައިވަނީ ފްލެޓް ޙަވާލުކުރާ ތާރީޚުން ފެށިގެން 3 މަސް ދުވަހުގެ ގްރޭސް ޕީރިއަޑަކަށްފަހުކަމަށް ޕްލޭނިންގ މިނިސްޓްރީން ވިދާޅުވިއެވެ. އަދި ކުލި ދައްކަންޖެހޭ ޖުމްލަ މުއްދަތަކީ 300 މަސް ނުވަތަ 25 އަހަރެވެ.