މަޖިލީހުގެ ހައިބަތާއި ކަރާމާތް ހިފަހައްޓަން "މަޖިލިސް މެންބަރުން ޢަމަލުކުރަންޖެހޭ ސުލޫކީ ކަންކަމުގެ ޤަވައިދު" އެކުލަވާލުމުގެ މަސައްކަތްތައް އަލުން ފަށްޓަވާނެކަމަށް މަޖިލީހަށް ދާދިފަހުން އިންތިހާބުކުރި ރައީސް މުޙައްމަދު އަސްލަމް ވިދާޅުވެއްޖެއެވެ.

އަސްލަމް ވިދާޅުވީ ޤާނޫނު އަސާސީގައި ބަޔާންކުރާ ގޮތުން، މަޖިލީހުގެ މެންބަރުން ތަބާވާންޖެހޭ ސުލޫކީ މިންގަނޑެއް އެކުލަވާލަން ޖެހޭކަމަށެވެ. މި ގަވައިދު އެކުލަވާލުމުގެ މަސައްކަތް މަޖިލީހުގެ ބައެއް ދަޢުރުތަކުގައި ކުރިއަށްގެންދިޔަކަން ފާހަގަކުރައްވާ އަސްލަމް ވިދާޅުވީ 19ވަނަ މަޖިލީހުގައި އެ މަސައްކަތް އޮތީ މުޅިން ހުއްޓިފައިކަމަށެވެ.

އެ ޤަވައިދު އެކުލަވާލާ، ޤާނުނު ބުނާގޮތަށް ޢަމަލުކުރަން ކުރަންޖެހޭ މަސައްކަތްތައް އަލުން ފެއްޓެވުމަށް މަޖިލީހުގެ ރައީސްގެ ޙައިސިއްޔަތު ނިންމަވާފައިވާކަމަށް އަސްލަމް ވަނީ ވިދާޅުވިއެވެ. މިއީ މަޖިލީހުގެ ނިޒާމު ނުގެއްލި، މަސައްކަތްތައް ކުރިއަށްގެންދިއުމަން އަޅަންޖެހޭ މުހިންމު ފިޔަވަޅެއްގެ ގޮތުގައި އަސްލަމް ފާހަގަކުރެއްވިއެވެ.

އަސްލަމް ވިދާޅުވީ މަޖިލީހުގެ ހައިބަތާ ޤަދަރު ހިފެހެއްޓުމަކީ މަޖިލީހުގެ ރައީސްއާއި މެންބަރުންގެ މަސްޢޫލިއްޔަތުކަމަށެވެ. ބައެއް މެންބަރުން ދެކެނީ މަޖިލީހަކީ ސިޔާސީ މަސައްކަތްކުރާ ތަނެއްގެ ގޮތުގައި ކަމަށާއި، ނަމަވެސް އެކަން އޮތީ އެގޮތަށް ނޫންކަމަށް މަޖިލީހުގެ ރައީސް ވިދާޅުވިއެވެ. އެއީ ޤާނުނު ހެދުމާއި، ސަރުކާރު ޖަވާބުދާރީ ކުރުމަށް މުހިންމު މައްސަކަތްތައް ކުރާ ތަނެއްކަމަށާއި، މަޖިލީހުގެ މަސައްކަތްތައް އެމަގުން ގެންދިއުމުގައި މަޖިލީހުގެ ރައީސްގެ އިތުރުން މެންބަރުންގެ މަސްޢޫލިއްޔަތު ފުރިހަމައަށް އަދާކުރުމަށް ގޮވާލާކަމަށް އަސްލަމް ވަނީ ވިދާޅުވެފައެވެ.