އަންނަ އަހަރަށް ލަފާކުރި 49.5 ބިލިއަން ރުފިޔާގެ ބަޖެޓް ފިނޭންސް މިނިސްޓަރ އިބްރާހީމް އަމީރު ރައްޔިތުންގެ މަޖިލީހަށް ހުށައަޅުއްވައިފިއެވެ. ފިނޭންސް މިނިސްޓަރ ބަޖެޓް ހުށަހަޅުއްވަމުން ގެންދެވިއިރު މަޖިލީހުގެ ތަޅުމުގައި މައިނޯރިޓީ ޕާޓީގެ މެމްބަރުން ގެންދިޔައީ އަޑުގަދަކޮށް ނިޒާމީ ނުކުތާ ނަގަމުންނެވެ.

މިބަޖެޓްގައި މިއަހަރު ރާއްޖޭގެ އިޤްތިސާދު 8.7 އިންސައްތަ އަށް ކުރިއަރާނެކަމަށްވަނީ ލަފާކޮށްފައެވެ. އަދި އަންނަ އަހަރު 5.5 އިންސައްތައިން ރާއްޖޭގެ އުފެއްދުންތެރިކަން އިތުރުވެ، މެދުރާސްތާގައި އެވްރެޖްކޮށް 6.7 އިންސައްތައިގެ އިތުރުވުމެއްގައި ކުރިއަށްދާނެކަމަށް ވަނީ ލަފާކޮށްފައެވެ.

އަންނަ އަހަރަށް ލަފާކޮށް ހުށައަޅާފައިވާ ބަޖެޓުގައި އާމްދަނީއާއި ހިލޭ އެހީގެގޮތުގައި ލިބޭނެ ކަމަށް އަންދާޒާކޮށްފައިވަނީ 33.5 ބިލިއަން ރުފިޔާއެވެ. ބަޖެޓުގައި ވަނީ ޓެކުހުގެ ގޮތުގަ ލިބޭ އާމްދަނީއާއި ހިލޭ އެހީގެ ގޮތުގައި ލިބޭ ފައިސާ އަންނަ އަހަރު އިތުރުވާނެކަމަށް ލަަފާކޮށްފައެވެ.

Advertisement

ބަޖެޓުގައި ކަނޑައަޅާފައިވާ 49.5 ބިލިއަން ރުފިޔާގެތެރެއިން ޚަރަދުގެ ގޮތުގައި ކަނޑައަޅާފައިވަނީ 47.3 ބިލިއަން ރުފިޔާއެވެ. އެއީ ރިކަރަންޓް ޚަރަދުގެ ގޮތުގައި 34.8 ބިލިއަން ރުފިޔާއެވެ. އަދި ކެޕިޓަލް ޚަރަދުގެ ގޮތުގައި 12.5 ބިލިއަން ރުފިޔާއެވެ.

އަންނަ އަހަރުގެ ބަޖެޓުގައި ޕަބްލިކް ސެކްޓަރ އިންވެސްޓްމަންޓް ޕްރޮޖެކްޓް، ޕީއެސްއައިޕީއަށް 8.6 ބިލިއަން ރުފިޔާ ކަނޑައަޅަފައިވެއެވެ. އެއީ ބަޖެޓުގެ %17އެވެ. ބަޖެޓުން 7.4 ބިލިއަން ހޭދަކުރާނީ ދަރަނި ސަރވިސްކުރުމުގެ މަސައްކަތްތަކަށެވެ. 

އަންނަ އަހަރަށް ލަފާކޮށް ހުށައަޅާފައިވާ ބަޖެޓުގައި މުވައްޒަފުންގެ މުސާރަ އާއި ޕެންޝަނަށް 14.0 ބިލިއަން ރުފިޔާ ކަނޑައަޅާފައިވެއެވެ. ތަކެއްޗާއި ޚިދުމަތް ހޯދުމާއި، ދަތުރުފަތުރާއި މަރާމާތު ފަދަ ރިކަރަންޓް ޚަރަދުތަކަށް 6.1 ބިލިއަން ރުފިޔާ، އަދި ސަބްސިޑީ އާއި އެހީ ދިނުމަށް 9.4 ބިލިއަން ރުފިޔާ ހިމަނާފައިވެއެވެ. އަދި ލޯނުގެ ޚިދުމަތުގެ ޚަރަދަށް 5.2 ބިލިއަން ރުފިޔާ ޚަރަދުވާނެކަމަށް ބަޖެޓުކޮށްފައިވެއެވެ.