މާލޭގެ މަގުމަތީގައި ދިރިއުޅެމުން ދިޔަ މާބަނޑު ބުޅަލަކަށް ވަޅިން ހަމަލާދީ މަރާލި ދިވެެއްސަކު ހައްޔަރުކޮށްފިއެވެ.

އެނގިފައިވާ ގޮތުގައި، އެމީހާ ވަޅިން ހަމަލާދީ މަރާލީ، އަމީރު އަހުމަދު މަގުގެ އިރުމަތީކޮޅުން ނަސަންދުރަ ކައިރި ހިސާބުގައި ދިރިއުޅެމުން ދިޔަ ބުޅަލެކެވެ.

އެމީހާ ބުޅަލަށް ވަޅިން ހަމަލާދޭ މަންޒަރު ފެންނަ ވީޑިއޯއާ އަދި އެމީހާ ހައްޔަރުކޮށްގެން ފުލުހުން ގެންދާ މަންޒަރު ފެންނަ ވީޑިއޯ ސޯޝަލް މީޑިއާގައި ދަނީ ދައުރުވަމުންނެވެ. ވީޑިއޯއިން ފެންނަ ގޮތުގައި އެމީހާ ވަޅި ހަރާފައި ވަނީ، ބުޅާ ޕޭމަންޓްމަތީގައި އޮށޯވެލައިގެން އޮއްވައި އޭގެ ބަނޑަށެވެ. އެބުޅާ އެނގޭ މީހަކު ސޯޝަލް މީޑިއާގައި ހާމަކޮށްފައިވާ ގޮތުގައި، ވަޅިހެރުމުގެ ސަބަބުން އެބުޅަލާއި އޭގެ ބަނޑުގައިވާ އަދި އުފަންނުވާ ބުޅާތައްވެސް ވަނީ މަރުވެފައެވެ.

ވަޅި ހެރުމުގެ ސަބަބުން މަރުވި ބުޅާ -- ފޮޓޯ: ސޯޝަލްމީޑިއާ

މިއަނިޔާވެރި އަމަލު ހިންގިމީހާއާ ދެކޮޅަށް ހަރުކަށި ފިޔަވަޅު އެޅުމަށް އާއްމުންދަނީ ސޯޝަލްމީޑިއާގައި ގޮވާލަމުންނެވެ. ރާއްޖޭގެ ޤާނޫނުތަކުގައި ބަޔާންކޮށްފައިވާ ގޮތުން، ބުޅާ ފަދަ ދިރޭ ޖަނަވާރުތަކަށް އަނިޔާކުރުމަކީ ޤާނޫނީ ކުށެެކެވެ.

މާލެއާ ހުޅުމާލޭގެ މަގުތައް މަތީގައި ގިނަ އަދަދެއްގެ ބުޅާތައް ދިރިއުޅޭ އިރު އެތަކެއްޗާއި މެދު ބައެއް މީހުން އަނިޔާވެރި އަމަލުތައް ހިންގައެވެ. އެހެން ނަމަވެސް މިއީ މިފަދަ އަނިޔާވެރި އަމަލެއް ފާހަގަވެގެން ދިޔަ ފުރަތަމަ ފަހަރެވެ.