ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކި ކުރަން އެމްޑީޕީން ހުށަހެޅި ގަރާރު ރައްޔިތުންގެ މަޖިލީހުގެ ގަވައިދާ ހިލާފުކަމަށް ކަނޑައަޅައި އެ މައްސަލަ ބޭރު ކޮށްލައިފިއެވެ. މިގޮތަށް ނިންމާފައިވަނީ މިއަދުގެ މަޖިލީހުގެ ރިޔާސަތު ބެލެހެއްޓެވި ވިލުފުށީ ދާއިރާގެ މެންބަރު ހަސަން އަފީފްއެވެ.

ސުޕްރީމް ކޯޓުގެ ހުކުމާ އެކު ނަޝީދު ވަކި ކުރުމުގެ މައްސަލަ މިއަދު އަފީފް ރިޔާސަތުގައި އިންނަވައިގެން ކުރިޔަށް ގެންދަން ނިންމުމާ އެކު މެދު ހެންވޭރު ދާއިރާގެ ޑިމޮކްރެޓްސްގެ މެމްބަރު އަލީ އާޒިމް ވަނީ ނިޒާމީ މައްސަލައެއް ނަންގަވައިފައެވެ.

އޭނާ ވިދާޅުވި ގޮތުގައި ނަޝީދު ވަކި ކުރަން އެމްޑީޕީން ހުށަހެޅި ގަރާރުގައި ސަބަބު ބަޔާންކޮށް ދީބާޖާ ނުހިމަނައެވެ. އެހެންވެ އެ މައްސަލާގައި ގަރާރެއްގެ ސިފައެއް ނެތް ކަމަށާއި އެއީ ބާތިލް ވާނެ އެއްޗެއް ކަމަށް އާޒިމް ވިދާޅުވިއެވެ.

އާޒިމްގެ އެ ވާހަކައާއެކު މަޖިލިސް ހޫނުވެ މެންބަރުންގެ މެދުގައި ޒުވާބު ކުރަން ފެށިއެވެ. އެ ވާހަކަ އަށް ޑިމޮކްރެޓްސްގެ އެހެން މެންބަރުން ވެސް ތާއީދު ކުރިއެވެ.

އެމްޑިޕީގެ މެންބަރުން ވިދާޅުވަމުން ގެންދެވީ، ޑިމޮކްރެޓްސް އިން ނިޒާމީ މައްސަލަ ނެގީ ނަޝީދު ވަކިކުރުމުގެ ގަރާރު ކުރިއަށް ގެންދިއުމަށް ހުރަސްއެޅުމަށް ކަމަށާއި، އެ ގަރާރު ހުށަހަޅާފައި ވަނީ ގަވައިދާ އެއްގޮތަށް ކަމަށެވެ.

އެހެންވެ އެހެން ހުރިހާ ކަމެއް ވެސް އޮންނާނީ ދެމިގެންދާ ގޮތަށް ގަވައިދުގެ އެހެން މާއްދާތަކާ ވެސް ގުޅިގެންދާ ގޮތަށް ކަމަށް އަފީފް ވިދާޅުވިއެވެ.