ސްޕެނިޝް ލަ ލީގާގައި ޖިރޯނާ މި ހަފްތާގެ މެޗު ވެސް ކާމިޔާބު ކުރުމުން، ރިއާލް މެޑްރިޑުން 3 ޕޮއިންޓު ހޯދި ނަމަވެސް ލީގުގެ އެއްވަނައަށް އަނބުރާ އެރޭގޮތެއް އެ ޓީމަކަށް ނުވިއެވެ. ޖިރޯނާއިން ހޯދި 3 ޕޮއިންޓާއެކީ މި ހަފްތާ ވެސް އެ ޓީމު ނިންމާލާނީ ލީގުގެ އެއްވަނައިގައި އޮވެއެވެ.

ފަހަތުން އަރާ ރަޔޯ ވަލެކާނޯގެ މައްޗަށް 2-1 އިން ޖިރޯނާ ހޯދި ކާމިޔާބާއެކީ، އެ ޓީމު ލީގުގައި އެންމެ ފަހުން ކުޅުނު 5 މެޗު ވެސް މިވަނީ ކާމިޔާބުކޮށްފައެވެ. ވަލެކާނޯގެ އެސްޓޭޑިއޯ ޑި ވަލެކާސްގައި ކުޅުނު މި މެޗުގައި އެ ޓީމުން ވަނީ މެޗުގެ 5 ވަނަ މިނެޓުގައި ލީޑު ނަގާފައެވެ. މި ގޯލު ކާމިޔާބުކޮށްދިނީ އެ ޓީމުގެ އަލްވާރޯ ގާސިއާއެވެ. މިއީ މި ސީޒަނުގައި އޭނާ ކާމިޔާބު ކޮށްދިން 4 ވަނަ ގޯލެވެ.

ޖިރޯނާއިން މެޗުގެ ނަތީޖާ ހަމަހަމަކުރީ ފުރަތަމަ ހާފު ނިމެން ދަނިކޮށް، އެ ޓީމުގެ ޔުކްރެއިން ފޯވާޑް އާޓެމް ޑޮވްބީކް ކާމިޔާބުކުރި ގޯލަކުންނެވެ. ޑޮވްބީކްއަކީ މި ސީޒަނުގައި މިހާތަނަށް ޖިރޯނާއަށް އެންމެ ގިނަ ގޯލު ކާމިޔާބުކޮށްދީފައިވާ ކުޅުންތެރިޔާއެވެ. ރޭގެ ގޯލާއެކު އޭނާވަނީ މި ސީޒަންގައި ޖުމްލަ 7 ގޯލު ކާމިޔާބުކޮށްފައެވެ.

ޖިރޯނާއަށް ލީޑު ލިބުނީ މެޗުގެ 65 ވަނަ މިނެޓުގައި ސެވިއޯ ކާމިޔާބުކޮށްދިން ގޯލަކުންނެވެ. މިއީ މި ސީޒަންގައި އޭނާގެ 4 ވަނަ ގޯލެވެ.

ވެލެންސިއާ އާ ދެކޮޅަށް ރެއާލް މެޑްރިޑުން ވަނީ މި ހަފްތާގައި ތަފާތު ބޮޑު މޮޅެއް ހޯދާފައެވެ. ފުރަތަމަ ހާފު ޑެނީ ކަވަހާލް އާއި ވިނީސިއަސް ޖުނިއަރ ކާމިޔާބުކުރި 2 ގޯލާއި، ފަހު ހާފުގައި ވިނީސިއަސްގެ އިތުރު ގޯލަކާއި، ރޮޑްރީގޯގެ 2 ގޯލާއެކު، މެޑްރިޑުން ވަނީ 5 ގޯލު ކާމިޔާބުކޮށްފައެވެ. އަދި މެޗުގެ ފަހު ވަގުތުކޮޅު ވެލެންސިއާގެ ހޫގޯ ޑުރޯ ކާމިޔާބުކުރި ގޯލާއެކީ މެޗު ނިމުނީ 5-1 އިންނެވެ.

ރޭގެ މެޗުގައި މެޑްރިޑްގެ ޖޫޑް ބެލިންގެހަމް، އޭނާގެ ކޮނޑު ހުޅަށް ލިބިފައިވާ އަނިޔާއަކާ ގުޅިގެން ނުކުޅެއެވެ. ނަމަވެސް އިންޓަނޭޝަނަލް ބްރޭކްއަށްފަހު، އަނިޔާއިން ރަނގަޅުވެ، ބެލިންގްހަމް ކުޅެން ފަށާނެކަމަށް ރިޕޯޓުތައް ބުނެއެވެ.