ޖަރުމަނު ބުންޑަސް ލީގާ ގައި ރޭ ހެއިޑެންހެއިމްއާ ބެޔާން މިޔުނިކް ބައްދަލުކުރި މެޗުގައި އިތުރު 2 ގޯލު ކާމިޔާބުކޮށް،  އެ ލީގުގައި 11 މެޗުން އެންމެ ގިނަ ގޯލު ޖެހި ކުޅުންތެރިޔާގެ ރެކޯޑު އިނގިރޭސި ކެޕްޓަން ހެރީ ކޭން އައުކޮށްފިއެވެ. ކުރިން މި ރެކޯޑް އޮތީ 11 މެޗުން 16 ގޯލު ކާމިޔާބުކުރި ރޮބާޓް ލެވަންޑޯސްކީ އަތުގައެވެ. އެއީ 2019 ވަނަ އަހަރު ލެވަންޑޯސްކީ އައުކުރި ރެކޯޑެކެވެ.

ރޭގެ ގޯލުތަކާއެކު، ކޭން މިވަނީ މި ސީޒަނުގައި މިހާތަނަށް ޖުމްލަ 17 ގޯލު ކާމިޔާބުކޮށްފައެވެ. ނަމަވެސް މިދިޔަ ސީޒަންގައި އެންމެ ގިނައިން ގޯލު ކާމިޔާބުކުރި ކްރިސްޓޮފާ އެންކުންކު އަދި ނިކްލަސް ފުލްކްރުގްއަށް ކާމިޔާބުކުރެވުނީ ޖުމްލަ 16 ގޯލެވެ.

ހެއިޑެންހެއިމް ކޮޅަށް ކޭން ކާމިޔާބުކުރި 2 ގޯލަކީވެސް، މެންޗެސްޓަރ ސިޓީއިން ބެޔާންއަށް ބަދަލުވި ލެޜޯއީ ސާނޭ ފަހިކޮށްދިން ފުރުސަރުތަކުން ފުރަތަމަ ހާފުގައި ކާމިޔާބުކުރި ގޯލުތަކެކެވެ. ފުރަތަމަ ގޯލަކީ، ހެއިޑެންހެއިމްގެ ގޯލު އޭރިޔާ ތެރެއަށް ހުރަސްކޮށްދިން ބޯޅައަކުން ޖެހި ގޯލެކެވެ. އަދި ދެވަނަ ގޯލު ކާމިޔާބުކުރީ ސާނޭ ނަގައިދިން ކޯނަރަކުން، ބޮލުންޖަހާ ބޯޅަ ގޯލުގެ ދާގަނޑަށް ފޮނުވާލައިގެންނެވެ.

ހެއިޑެންހެއިމްއިން ދެވަނަ ހާފުގައި ވަނީ ނަތީޖާ ހަމަހަމަކޮށްފައެވެ. އެގޮތުން 3 މިނެޓުގެ ތެރޭގައި، މެޗުގެ 67 އަދި 70 ވަނަ މިނެޓުގައި، އެ ޓީމުގެ ޓިމް ކްލެއިންޑިއެސްޓް އަދި ޖެން-ނިކްލަސް ބެސްޓޭ ވަނީ ގޯލުޖަހާ މެޗު އަނބުރާލަން މަސައްކަތްކޮށްފައެވެ. ނަމަވެސް ބެޔާންއިން ބަދަލު ކުޅުންތެރިއެއްގެ ގޮތުގައި ކުޅެން ނެރުނު ރަފިއަލް ގުއެރޭރޯވަނީ މެޗުގެ 72 ވަނަ މިނެޓުގައި ބެޔާންއަށް އަނެއްކާވެސް ލީޑު ނަގައިދީފައެވެ. އަދި ބެޔާންގެ ފަހު ގޯލު، 85 ވަނަ މިނެޓުގައި ކާމިޔާބުކޮށްދިނީ ވެސް ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޗޮޕޮ-މޯޓިންއެވެ.

ހެއިޑެންހެއިމްގެ މައްޗަށް 4-2 ން ކާމިޔާބު ހޯދާ ބެޔާން ވަނީ ލީގުގެ އެއްވަނައަށް ޖެހިލާފައެވެ. ނަމަވެސް މި ހަފްތާ ނިމޭއިރު ލީގު އެއްވަނައިގައި އޮންނާނެ ޓީމެއް އެނގޭނީ މިރޭ ބެޔާން ލެވަކޫސަންގެ މެޗަށް ފަހުއެވެ. ލެވަކޫސަން މޮޅުވެއްޖެނަމަ، އެ ޓީމު ލީގު އެއްވަނައަށް އަރާނެއެވެ.