އިންޑިއާގެ ނެއިބަހުޑް ފަސްޓް ސިޔާސަތުގައި ދިވެހިރާއްޖެއަކީ، ޚާއްޞަ މަޤާމެއް ލިބިފައިވާ ޤައުމެއް ކަމުގައި އިންޑިއާގެ ބޮޑު ވަޒީރު ވިދާޅުވެއްޖެއެވެ.

އިންޑިއާގެ ބޮޑުވަޒީރު ނަރެންދުރަ މޯދީ މިހެން ވިދާޅުވީ، މިއަދު ފާހަގަކުރާ ދިވެހިރާއްޖޭގެ ޖުމްހޫރީ ދުވަހުގެ މުނާޞަބާގައި ފޮނުއްވި ތަޙްނިޔާގެ މެސެޖުގައެވެ.

އިންޑިއާގެ ބޮޑުވަޒީރު ނަރެންދުރަ މޯދީގެ މެސެޖުގައި، މިސަރަހައްދުގެ ސަލާމަތާއި ކުރިއެރުމުގެ ތަޞައްވުރު، ސެކިއުރިޓީ އެންޑް ގްރޯތް ފޯރ އޯލް އިން ދަ ރީޖަން (އެސް.އޭ.ޖީ.އޭ.އާރް) ޤާއިމްކޮށްދިނުމުގައި ދިވެހިރާއްޖެއަކީ އިސްދައުުރެއް އަދާކުރާ ޤައުމެއް ކަމުގައިވެސް ވިދާޅުވިއެވެ. މީގެ އިތުރުން މިމެސެޖުގައި، މޯދީ ވިދާޅުވީ، ދެޤައުމުގެ ރައްޔިތުންގެ އިޖްތިމާޢީ، އަދި އިޤުތިޞާދީ ކުރިއެރުމަށްޓަކައި، ދިވެހިރާއްޖެއާ ގުޅިގެން މަސައްކަތް ކުރުމަށް އިންޑިއާއިން މަސައްކަތްކުރާނެ ކަމުގެ ޔަޤީންނަށް އަރުވާކަމަށެވެ. އަދި ކުރިޔަށް އޮތް ތަނުގައި ދެޤައުމުގެ ގުޅުން އެކިދާއިރާތަކުން ކުރިއަރައި އައު އުސްމިންތަކަކަށް ދެވޭނެކަމަށް ޤަބޫލު ކުރައްވާކަމުގައިވެސް މޯދީގެ މެސެޖުގައި ވަނީ ވިދާޅުވެފައެވެ.

އިންޑިއާގެ ބޮޑުވަޒީރު ނަރެންދުރަ މޯދީ ފޮނުއްވި މެސެޖުގައި، ދުވަހުގެ ހެޔޮއެދުމާއި ތަޙުނިޔާތައް އަރިސްކުރައްވައި ވިދާޅުވީ، އިންޑިއާ އާއި ދިވެހިރާއްޖެއާ ދެމެދުގައި އުފެދިފައިވާ ގާތްގުޅުމަކީ، ތާރީޚާއި ޘަޤާފަތުގެ މައްޗަށް ބިނާވެފައިވާ ގުޅުމެއް ކަމަށެވެ.