ސަޢޫދީއަރަބިއްޔާގައި މަސަައްކަތު މީހުންގެ ގޮތުގައި މަސައްކަތް ކުރަމުން ދިޔަ އިންޑިއާގެ ފަސްމީހަކު ދިރިތިއްބައި ވަޅުލައި މަރާލި ކަމުގެ ކުށް ސާބިތުވެފައިވާ 3 މީހެއްގެ މައްޗަށް އިއްވާފައިވާ މަރުގެ ޙުކުމް ތަންފީޒްކޮށްފިއެވެ.

އެމީހުންގެ މައްޗަށް މަރުގެ ޙުކުމް ތަންފީޒް ކުރެވުނު ތިން މީހުންނަކީ، ޖާސިމް ބިން ޖައްސިމް ބިން ޙަސަން އަލް މުޠަވާ ނަމަކަށް ކިޔާ މީހަކާ، އައްމާރު ބިން ޔޫސުފް ބިން ޢަލީ އަލްދާހިމް ކިޔާ މީހަކާ، މުރުތަޟާ ބިން ހާޝިމް ބިން މުޙައްމަދު އަލް މުސާވީ ނަމަކަށް ކިޔާމީހެވެ.

އެމީހުންގެ މައްޗަށް މަރުގެ ހުކުމް ތަންފީޒް ކުރީ، މީގެ 13 އަހަރު ކުރިން އެ ތިން މީހުންވެގެން އިންޑިއާގެ 5 ލޭބަރުން ދިރިތިއްބައި ވަޅުލައި މަރާލިކަން އެމީހުންގެ މައްޗަށް ސާބިތުވެގެން މަރަށް މަރު ހިފުމަށް ޙުކުމްކޮށްފައިވާތީއެވެ. އިންޑިއާގެ ފަސްމީހުން ދިރިތިއްބައި ވަޅުލައި މަރާލާފައި ވަނީ، ސަޢޫދީ ޢަރަބިއްޔާގެ ޤާތިފް އާއި ކައިރީގައިވާ، ސަފްވާގެ ދަނޑުބިމެއްގެ ތެރޭގައެވެ. މިއަމަލު އެމީހުން ހިންގާފައި ވަނީ 2010 ވަނަ އަހަރުގައެވެ.

Advertisement

އެދަނޑުބިމުގެ ތެރޭގައި އެމީހުން ވަޅުލައި މަރާލާފައިވާ ކަން އެނގުނީ 2014 ވަނަ އަހަރު އެދނަޑުބިން ކުއްޔަށް ހިފި ޢަލީ ހަބީބީ ނަމަކަށް ކިޔާ މީހަކަށް އެދަނޑުބިމުގެ ތެރެއިން އިންސާނުންގެ ކަށިތަކެއް ފެނުމުންނެވެ.

އޭނާ ބުނެފައިވާ ގޮތުގައި އެންމެ ފުރަތަމަ އޭނާ ހީކުރީ އެއީ ޖަނަވާރުންގެ ކަށިތަކެއް ކަމަށެވެ. އެހެން ނަމަވެސް އެއީ އިންސާނުންގެ ކަށިތަކެއް ކަން އެނގުމާއި އެކު އޭނާ ސަޢޫދީ ޢަރަބިއްޔާގެ ފުލުހުންނަށް މައްސަލަ ރިޕޯޓްކުރީއެވެ.

ފެނުނު ފަސްމީހުންގެ ކަށިތައް ފުލުހުން ތަހުލީލު ކުރުމުން އެނގުނީ އެމީހުން ވަޅުލާފައި ވަނީ އަތްފައިބަނދެ އަދި އަނގަޔަށް ފޮތި ގަންނަަވައި، ޓޭޕްވެސް އަޅާފައި ކަމެވެ. އެހެންވެ އެއީ ބަޔަކު ގަސްދުގައި ދިރިތިއްބައި ވަޅުލައި މަރާލާފައިވާ ބައެއްކަން އޮޅުމެއް ނެތްވަރަށް ސާބިތުވާން އޮތުމާއި އެކު ޤާތިލުން ހޯދުމަށް ސަޢޫދީ ފުލުހުން ތަޙްޤީޤުތައް ފެށިއެވެ.

ދަނޑުބިމަކުން ފެނުނު ވަޅުލައި މަރާލާފައިވާ އިންޑިއާގެ 5 މީހުންގެ ކަށިތައް --

އެމައްސަަލައިގެ ތަޙްޤީޤަށް އެންގުނު ގޮތުގައި އިންޑިއާގެ 5 މީހުން މަރާލުމުގެ ފަހަތުގައި ތިބީ ފަދުވިލާ ސަލީމް ނަމަކަށް ކިޔާ މީހަކާ އޭނާގެ ރަޙުމަތްތެރިއެކެވެ. އިންޑިއާގެ 5 މަސައްކަތު މީހުން މަރާލާފައި ވަނީ އޭގެ ތެރެއިން މީހަކު، އޭނާގެ ސްޕޮންސަރ ގެ އަންހެންދަރިއަކަށާއި އަދި އެހެން އަންހެނުންތަކަށް ޖިންސީ ފުރައްސާރަކުރުމުންނެވެ. އެހެންވެ އެކަމުގެ އަދަބެއްގެ ގޮތުން އެމީހުން އިންޑިއާގެ ފަސް މަސައްކަތްތެރިން އެއްކޮށް ދިރިތިއްބައި ވަޅުލައި މަރާލީއެވެ.