މާދަމާ ފަހާގަކުރާ ދިވެހިރާއްޖޭގެ ޖުމްހޫރީ ދުވަހުގެ މުނާަޞަބަތާއި ގުޅުވައިގެން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ޤައުމާއި މުޚާތަބުކުރައްވައި ތަޤުރީރު ކުރައްވާނެ ކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، އެމަނިކުފާނު ޤައުމާ މުޚާޠަބު ކުރައްވާނީ ރާއްޖޭގެ ޚަބަރު ފަތުރާ ވަޞީލަތްތައް މެދުވެރިކުރައްވައި މާދަމާ ހެނދުނު 10:00 ޖަހާއިރުގައެވެ.

ރައީސުލްޖުމްހޫރިއްޔާގެ ޚިޠާބަކީ، އެމަނިކުފާނުގެ ރިޔާސީ ދައުރުގައި ދެއްވާނެ މިފަދަ އެންމެ ފަހު ޚިޠާބެވެ. މިޚިޠާބުގައި އެމަނިކުފާނުގެ ރިޔާސީ ދައުރާއި، ރާއްޖޭގެ ޖުމްހޫރީ ޙަޔާތާއި، ޑިމޮކްރަސީގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާނެ ކަމަށް ބެލެވެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރިޔާސީ ދައުރު ހަމަވާނީ މި ނޮވެމްބަރު މަހުގެ 17 ވަނަ ދުވަހަށެވެ. 

ދިވެހިރާއްޖޭގެ ޖުމްހޫރީ ދުވަހުގެ ގޮތުގައި ނޮވެމްބަރު މަހުގެ 11 ވަނަ ދުވަސް ފާހަގަކުރަމުން އައީ ރިޔާސީ ދައުރު ބަދަލުވާ ދުވަހާއިވެސް ގުޅުވައިގެންނެވެ. އެހެން ނަމަވެސް 2013 ވަނަ އަހަރުން ފެށިގެން ރިޔާސީ ދައުރު ބަދަލުވާ ދުވަހަކީ، ނޮވެމްބަރު މަހުގެ 17 ވަނަ ދުވަސް ކަމުގައި ހަމަޖެހުނީ، ރިޔާސީ އިންތިޚާބު ނުބޭއްވި ލަސްވެގެން ދިޔުމާއިއެކު، ކުރީގެ ރައީސް ޔާމީނުގެ ރިޔާސީ ދައުރު ފެށުނީ ނޮވެމްބަރު 17ގައި ކަމަށް ވުމުންނެވެ.

ދިވެހިރާއްޖޭގެ ދެވަނަ ޖުމްހޫރިއްޔާ ފެށުނީ، 11 ނޮވެމްބަރު 1968ގެ 00:00ގައި، އިބްރާހީމް ނާޞިރު، ދިވެހިރާއްޖޭގެ ރައީސުލްޖުމްހޫރިއްޔާގެ މަޤާމުގެ ހުވާކުރެއްވުމާއި ހަމައިންނެވެ.