ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު މުލީއާގެ ދޫކުރައްވައި އެހެން ގެކޮޅަކަށް ދިރިއުޅުން ބަދަލުކުރައްވައިފިއެވެ.

ރައީސުލްޖުމްހޫރިއްޔާގެ ދެކަނބަލުން ރައީސުލްޖުމްހޫރިއްޔާގެ ރަސްމީގެކޮޅު މުލީއާގެއިން ނުކުމެވަޑައިގެންނެވި އިރު، އަންނަ ހުކުރު ދުވަހަށް އެމަނިކުފާނުގެ ރިޔާސީ ދައުރު ހަމަވާނެއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްއަށް ފަހު، ދެން ދިވެހިރާއްޖޭގެ ރިޔާސަތަށް ހަވާލުވެވަޑައިގަންނަވާނީ މިހާރުގެ އިންތިޚާބީ ރައީސް ޑރ. މުޙައްމަދު މުޢިއްޒެވެ. ރައީސުލްޖުމްހޫރިއްޔާގެ ދެކަނބަލުން ދިރިއުޅުއްވުމަށް ދައުލަތުން ހަމަޖައްސަވާފައިވާ ރަސްމީ ގެކޮޅަކީ މުލީއާގެ ކަމަށް ވީނަމަވެސް، ހުވާކުރެއްވުމަށްފަހު ޑރ. މުޙައްމަދު މުޢިއްޒު ދިރިއުޅުއްވުން މުލީއާގެއަށް ބަދަލުކުރައްވާނެކަމާއި މެދު އަދި އެމަނިކުފާނުގެ އޮފީހުން އެއްވެސް އެއްޗެއް ވިދާޅެއް ނުވެއެވެ. އިންތިޚާބީ ރައީސް ޑރ. މުހައްމަދު މުއިއްޒުގެ ދެކަނބަލުން ދިރިއުޅުއްވަމުން ގެންދަވަނީ، ޑރ. މުޢިއްޒުގެ އަމިއްލަފުޅު ގެކޮޅު މާފަންނު ދިމްޔާތުގައެވެ.

2018 ވަނަ އަހަރުގެ ރިޔާސީ އިންތިޚާބު ކާމިޔާބު ކުރެއްވުމަށްފަހުގައި، 17 ނޮވެމްބަރު 2018ގައި ވެރިކަމުގެ ހުވާކުރެއްވުމަށްފަހު، ރައީސުލްޖުމްހޫރިއްޔާގެ ދެކަނބަލުން މުލީއާގެއަށް ދިރިއުޅުއްވުން ބަދަލުކުރެއްވީ، 30 ނޮވެމްބަރު 2018ގައެވެ.