ފަލަސްޠީނުގެ ޣައްޒާގެ ރައްޔިތުންނާއި ދެކޮޅަށް އިޒްރާއީލުން ހިންގަމުންދާ ޢުދުވާންތަކާއި ޤަތުލް އާއްމުތަކާއި ދެކޮޅު ހެދުމުގެ ގޮތުން، މިހާތަނަށް ދުނިޔޭގެ 9 ޤައުމަކުން އިޒްރޭލާ ގުޅުން ކަނޑާލައިފިއެވެ.

އިޒްރޭލާއިއެކު ސިޔާސީ ގުޅުން ޤާއިމްކޮށްފައިވާ ޤައުމުތަކުގެ ތެރެއިން، މިހާތަނަށް ގުޅުން ކަނޑާލާފައިވާ ޤައުމުތަކުގެ ތެރޭގައި ހިމެނެނީ، ބަހްރައިން، ހޮންޑިއުރާސް، ބޮލީވިއާ، ޖޯޑަން، ކޮލަމްބިއާ،  ސައުތް އެފްރިކާ، ޗާޑް، އަދި ތުރުކިޔޭ އާ ޗިލީންނެވެ. މިޤައުމުތަކުން ވަނީ އެޤައުމުތަކުގެ ސަފީރުން އަނބުރާ ގެނައުމުގެ އިތުރުން، އެޤައުމުތަކުގައި ތިބި އިޒްރޭލުގެ ޑިޕްލޮމެޓުންވެސް ފޮނުވާލާފައެވެ.

އިޒްރޭލުން 8 އޮކްޓޫބަރުން ފެށިގެން ޣައްޒާއަށް ވައިގެ މަގުން ހަމަލާތައް ދެމުންގެންދާއިރު، އިޒްރޭލުން ހިންގަމުންދާ ހަނގުރާމައިގެ ޖަރީމާތަކާއި ލާއިންސާނީ އަމަލުތައް ބައިނަލް އަޤުވާމީ މުޖުތަމަޢުންނާއި، ޤައުުމުތަކުން ދަނީ ކުއްވެރިކުރަމުންނެވެ. އަދި މުޅިދުނިޔޭގައި އިޒްރޭލާއި ދެކޮޅަށް ދަނީ ބޮޑެތި އެއްވުންތަކާއި މުޒާހަރާތައް ބާއްވަމުންނެވެ.

އިޒްރޭލުން އޮކްޓޫބަރު މަހުގެ 8 ވަނަ ދުވަހުންފެށިގެން ފަލަސްޠީނުގެ ރައްޔިތުންނަށް އަމާޒުކޮށް ދެމުންދާ ހަމަލާތަކުގައި މިހާތަނަށް ހުޅަނގު އައްސޭރިންނާއި ޣައްޒާއިން 10300 ވުރެ ގިނަ މީހުން ޝަހީދުވެފައެވެ. އަދި އިޒްރޭލުގެ ހަމަލާތަކުގައި ބިމާހަމަކޮށްލާފައިވާ އެތައް އިމާރާތްތަކެއްގެ ދަށުގައި އެތައް ބަޔަކު ވަނީ ތާށިވެފައެވެ. އަދި މަރުވެފައިވާ މީހުންގެ ހަށިތައް ނެގުމަށްވެސް ވަނީ ނުކުޅެދިފައެވެ.

އިޒްރޭލުން ޣައްޒާއަށް ހަމަލާދެމުންދާތާ 34 ދުވަސް ވީއިރު، މިހާތަނަށް އިޒްރޭލަށް ހަމާސްއިން އަސީރުންގެ ގޮތުގައި ގެންގޮސްފައިވާ އެއްވެސް މީހަކު ހޯދިފައި ނުވަތަ ސަލާމަތްކުރެވިފައިވެސް ނުވެއެވެ.