ގެދޮރުވެރިޔާ ސްކީމުން މާލެ ސަރަހައްދުން ފުލެޓަށް އެދި ހުށަހެޅި ފަރާތްތަކުގެ ދާއިމީ ލިސްޓާއި ގުޅިގެން ޝަކުވާ ހުށަހެޅުމުގެ މުއްދަތު އިތުރުކޮށްފިއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބުނީ، ގެދޮރުވެރިޔާ ސްކީމުން މާލެ ސަރަހައްދުން ފުލެޓަށް އެދި ހުށަހެޅި ފަރާތްތަކުގެ ދާއިމީ ލިސްޓަށް ޝަކުވާ ހުށައެޅުމަށް ދީފައިވާ ފުރުޞަތު، އިތުރުކޮށްފައި ވަނީ، ގިނަ ފަރާތްތަކެއްގެ އެދުމުގެ މަތިން ކަމަށެވެ. މިގޮތުން، 10 ނޮވެންބަރު 2023 ގެ 23:59އަށް ޝަކުވާ ހުށަހެޅުމުގެ މުއްދަތު އިތުރުކޮށްދީފައިވާ ކަމުގައި އެމިނިސްޓްރީން ވިދާޅުވިއެވެ. 

ކުރިން އެމިނިސްޓްރީން ޝަކުވާ ހުށައެޅުމަށް ހުޅުވާލާފައި އޮތީ މިއަދުގެ ނިޔަލަށެވެ.

ގެދޮރުވެރިޔާ ސްކީމުން މާލެ ސަރަހައްދުން ފުލެޓަށް އެދި ހުށަހެޅި ފަރާތްތަކުގެ ދާއިމީ ލިސްޓް އާއްމު ކުރުމާއިއެކު ގިނަ ފަރާތްތަކަކުން ވަނީ މާކްސް ދީފައިވާ ގޮތާއި މެދު ޝަކުވާކޮށްފައެވެ. 

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބުނީ، ގެދޮރުވެރިޔާ ސްކީމުން މާލެ ސަރަހައްދުން ފުލެޓަށް އެދި ހުށަހެޅި ފަރާތްތަކުގެ ތެރެއިން ފުރަތަމަ 4000 ފްލެޓް ލިބޭ ފަރާތްތައް ކަނޑައެޅުމަށް ޕޮއިންޓް ދީފައި ވަނީ، ފްލެޓަށް އެދި ހުށައެޅި ފަރާތްތަކުން ދީފައިވާ މައުލޫމާތުގެ މައްޗަށް ބިނާކޮށް ކަމަށެވެ. އަދި ފްލެޓް ލިބޭ ފަރާތްތަކަށް ފްލެޓް ދިނުމުގެ އިތުރުން، ފްލެޓަށް ޝަރުޠު ހަމަވެ، މި ބުރުގައި ފްލެޓް ނުލިބޭ ފަރާތްތަކަށް ލިޔުމެއް ދޫކުރާނެ ކަމަށެވެ.