ފާއިތުވެ ދިޔަ 48 ގަޑި އިރުގެ ތެރޭގައި ޙަމާސްގެ މުޖާހިދުން، އިޒްރާއީލްގެ ޓެރަރިސްޓް ސިފައިންގެ 27 އުޅަނދު ހަލާކުކޮށްލާފައިވާ ކަމުގައި އެޖަމާއަތުން ބުނެފިއެވެ.

ޙަމާސް ޖަމާއަތުގެ ތަރުޖަމާން ޢަބޫ ޢުބައިދާ ވިދާޅުވީ، ޣައްޒާއަށް ވަދެ ހަނގުރާމަކުރަމުންދާ އިޒްރޭލު ޓެރަރިސްޓް ސިފައިންގެ 27 އަސްކަރީ އުޅަނދަކަށް، މޯޓަރޝެލްއިންނާ ބޮމުން ހަމަލާދީ ހަލާކުކޮށްލާފައިވާ ކަމަށެވެ. 

ރިޕޯޓްތައް ބުނާގޮތުގައި، ޣައްޒާއަށް ވަތް އިޒްރާއީލުގެ އަސްކަރީ އުޅަނދުތަކުގެ ތެރެއިން 100އަށް ވުރެ ގިނަ އުޅަނދު ވަނީ ހަމާސްގެ މުޖާހިދުންގެ ހަމަލާތަކުގައި ހަލާކުވެފައެވެ. އަދި ގިނަ އަދަދެއްގެ އިޒްރާއީލް ޓެރަރިސްޓް ސިފައިންވެސް ވަނީ މަރާލާފައެވެ.

އިޒްރާއީލުން ލުބުނާނަށް ހަމަލާދީ ކުޑަ ތިންކުދިންނާއި އަންހެނަކު ޝަހީދުކޮށްލުމުން އެކަމުގެ ބަދަލު ހިފުމަށް ޙިޒްބުﷲއިން ދިން މިސައިލް ހަމަލާއެއްގައި އިޒްރާއީލް ސިފައިންގެ ގިނަ އަދަދެއްގެ ސިފައިން ގޮވައިގެން ދަތުރުކުރި ޓްރަކެއް ވަނީ ހަލާކުކޮށްލާފައެވެ. އެހަމަލާގައި އެޓްރަކްގައި އެވަގުތު ތިބި ހުރިހާ އިޒްރޭލު ސިފައިން މަރުވާނެ ކަމަށް ބެލެވިފައިވެއެވެ.

ހަނގުރާމައިގައި އިޒްރޭލު ސިފައިންގެ ގިނަ އަދަދެއްގެ ބަޔަކު މަރުވަމުންދާއިރު، ލިބޭ ގެއްލުންތަކާއި މަރުވަމުންދާ ސިފައިންގެ އަދަދު އިޒްރޭލުން ތަފްސީލްކޮށް ހާމައެއް ނުކުރެއެވެ. އަދި ލުބުނާނުން ދިން ހަމަލާގައި މަރުވީ ކިތައް ސިފައިން ކަމެއްވެސް އިޒްރޭލުން ހާމައެއް ނުކުރެއެވެ. އެންމެ ފަހުން އިޒްރޭލުން ބުނެފައި ވަނީ، ހަނގުރާމައިގައި މިހާތަނަށް އިޒްރޭލު ސިފައިންގެ ތެރެއިން މަރުވެފައި ވަނީ 338 މީހުން ކަމަށެވެ. އެހެން ނަމަވެސް އެއަދަދު އެއަށްވުރެ އެތައްތަނެއް އިތުރުވާނެ ކަމުގައި ޙަމާސްއިންވެސް ވަނީ ބުނެފައެވެ.

އިޒްރޭލުން ޣައްޒާއަށް ވައިގެ މަގުން ވަރުގަދަ ހަމަލާތައް ދެމުން އަންނަތާ 30 ދުވަސްވީއިރު، އިޒްރޭލުގެ ވައިގެ ހަމަލާތަކުގައި ޝަހީދުވު ފަލަޞްތީނުގެ އާއްމުންގެ އަދަދު މިހާރު ވަނީ، 10000 ވުރެ މަތިވެފައެވެ.