ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކުން އަމަލުކުރުމުގެ ގާނޫނުގެ ދަށުން، އެކުލަވާލާފައިވާ،  ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރު ޑިޖިޓަލްކޮށް އާއްމުކޮށްފިއެވެ.

މި ދަފްތަރު ވަނީ، ޖެންޑަރ މިނިސްޓްރީގެ ވެބްސައިޓުންނާއި، ޕީޖީގެ އޮފީހުގެ ވެބްސައިޓުންވެސް ފެންނަ ގޮތް ހަދާފައެވެ. މި ދަފްތަރު، ކުރިން ޖެންޑަރ މިނިސްޓްރީގެ ވެބްސައިޓްގައި އާއްމުކޮށްފައި އޮންނަނީ، ޕީޑީއެފްފައިލެއްގެ ގޮތުގައެވެ.

މިއަދު މިދަފްތަރު އާއްމުކޮށްދެއްވީ، ޖެންޑާ މިނިސްޓަރ އާއިޝަތު މުޙައްމަދު ދީދީއެވެ.

ޖެންޑަރ މިނިސްޓްރީން ވިދާޅުވީ، ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރެއް އެންމެ ފުރަތަމަ ފަހަރަށް އެކުލަވާލައިފައި ވަނީ 2018 ވަނަ އަހަރުގައި ކަމަށެވެ. އަދި މި ދަފްތަރުގައި އެމީހުންގެ ވަނަވަރުގެ އިތުރުން ކުރި ކުށުގެ ބާވަތާއި، ޙުކުމް ތަންފީޒުކޮށް ނިމޭ ތާރީޚް ފަދަ މުޙިންމު މަޢުލޫމާތުތައް ހިމަނައި، ދަފްތަރު އަދާހަމަކޮށް ޝާއިއުކުރަމުން އައިކަމުގައި ވީނަމަވެސް އާންމުންނަށް އެ ވެބްސައިޓަށް ވާޞިލުވުމަށް ދަތިތަކާއި ކުރިމަތިވަމުން އައިކަން ފާހަގަކުރެވިފައިވާ ކަމަށެވެ. އަދި މި ދަފްތަރު ޑިޖިޓަލައިޒް ކުރުމުގެ މަޤްޞަދަކީ މީގެކުރިން މެނުއަލްކޮށް އަޅަމުންދިޔަ މަޢުލޫމާތު ލަސްކަމެއްނެތި ވަގުތުން އަދާހަމަކުރުމާއި، އަދި އާންމުންނަށް ފަސޭހައިން މިދަފްތަރުގައި ހުރި މަޢުލޫމާތަށް ވާޞިލުވެވޭނެ ގޮތް ހެދުންކަމުގައިވެސް އެމިިނިސްޓްރީން ވިދާޅުވެއެވެ. މިގޮތުން، ފިލްޓަރކޮށް ދަފްތަރުގައި ހިމެނޭ މީހުންގެ ދިވެހި ރައްޔިތެއްކަން އަންގައިދޭ ކާޑު ނަންބަރު ބޭނުންކޮށްގެންވެސް މަޢުލޫމާތު ހޯދޭނެގޮތް މިހާރުވަނީ ފަހިވެފައި ކަމުގައިވެސް އެމިނިސްޓްރީން ވަނީ ވިދާޅުވެފައެވެ.

 ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރާއި ގުޅޭ މަޢުލޫމާތެއް ހިއްސާކުރުމަށް ނުވަތަ ޝަކުވާއެއް އޮތް ނަމަ ޗައިލްޑް އެންޑް ފެމިލީ ޕްރޮޓެކްޝަން ސަރވިސްގެ އީމެއިލް [email protected] މެދުވެރިކޮށް އެޝަކުވާއެއް ހިއްސާކޮށްދެއްވުމަށްވެސް އެމިނިސްޓްރީން ވަނީ އެދިފައެވެ.

ދުނިޔޭގެ ތަރައްޤީވެފައިވާ ޤައުމުތަކުގައިވެސް، ކުޑަކުދިންނަށް ޖިންސީ ގޯނާ ކުރާ މީހުން އެނގޭގޮތަށް ލިސްޓްތައް އާއްމުކޮށްފައި ހުރެއެވެ. މިގޮތުން އާއްމުކޮށްފައިވާ ލިސްޓްތަކުގައި އެފަދަ މީހުން ދިރިއުޅޭ ސަރަހައްދުތައްވެސް އެނގޭ ގޮތަށް، ޕިންކޮށްފައި ހުރެއެވެ.