އާދީއްތަ ދުވަހުގެރޭ ރެއާލް މެޑްރިޑާއި ރަޔޯ ވަލެކާނޯ ބައްދަލުކުރި މެޗު 0-0 ން އެއްވަރުވުމުން، ޖިރޯނާއަށް ސްޕެނިޝް ލަ ލީގާގެ އެއްވަނައިގައި 2 ޕޮއިންޓުގެ ލީޑެއް ލިބިއްޖެއެވެ. މިއީ ޖިރޯނާގެ ތާރީހުގައި ވެސް، ސްޕެނިޝް ލީގުގެ އެއްވަނައިގައި މިވަރުގެ ލީޑެއް ލިބުނު ފުރަތަމަ ފަހަރެވެ. އެ ޓީމުން މި ހަފްތާގައި ކުޅުނީ އޮސަސުނާ އާ ދެކޮޅަށެވެ. އެ މެޗު އޮސަސުނާގެ ދަނޑުގައި 4-2 ން ކާމިޔާބުކުރީ ޖިރޯނާއެވެ.

ޖިރޯނާ ސްޕެނިޝް ލީގުގެ އެއްވަނައިގައި މުޅިން އަލަށް ފެނިލާފައިވަނީ ވެސް މި ސީޒަންގައެވެ. އެއީ މިދިޔަ ސެޕްޓެމްބަރ މަހު އެ ޓީމުން ވިލަރިއާލް ބަލިކުރި ހަފްތާގައި، އޭރު ލީގުގެ އެއްވަނައިގައި އޮތް ބާސެލޯނާ، ރިއަލް މަޔޯކާއާ ކުޅެ އެއްވަރުވުމުންނެވެ. އަދި އޭގެ ފަހުން، ފާއިތުވި 3 ގޭމް ވީކްގައި ވެސް ޖިރޯނާ އޮތީ މެޑްރިޑާ ޕޮއިންޓުގެ ގޮތުން އެއްވަރެއްގައެވެ. މެޑްރިޑް ލީގުގެ އެއްވަނައިގައި އޮތީ ގޯލް ތަފާތުންނެވެ.

ޖިރޯނާ ސްޕެނިޝް ފުރަތަމަ ޑިވިޝަންގައި އެންމެ ފުރަތަމަ ކުޅެފައިވަނީ 2017/18 ސީޒަންގައެވެ. އެ ފަހަރު 10 ވަނައިގައި ސީޒަން ނިންމާލަން ޖެހުނުއިރު، ޖެހިގެން އައިސީޒަންގައި 18 ވަނަ ލިބި، އަނެއްކާވެސް ސަގުންޑާ ޑިވިޝަނަށް އެ ޓީމު ރެލިގޭޓް ވިއެވެ. އެއަށްފަހު ލަ ލީގާއަށް އެ ޓީމުން އަނބުރާ އައީ މިދިޔަ ސީޒަންގައެވެ. މިދިޔަ ސީޒަންގައި އެމީހުނަށް ލިބުނީ 10 ވަނަ އެވެ. އަދި އެއަށްފަހު ހަމައެކަނި މިހާތަނަށް މި ސީޒަންގައި ހޯދާފައިވާ ނަތީޖާތަކަށް ބަލާލިޔަސް، މިއީ އެ ޓީމުގެ ތާރީހުގައި އައި އެންމެ ކާމިޔާބު ސީޒަންކަމުގައި ވާނެކަން ޔަގީނެވެ. 

މި ޓީމުގެ %44.3 ހިއްސާ އޮންނަނީ ސިޓީ ފުޓްބޯލް ގްރޫޕުން (ސީ.އެފް.ޖީ.) ގަނެފައެވެ. މިއީ އަބޫ ދާބީ ޔުނައިޓެޑް ގްރޫޕްގެ ސަބްސިޑަރީ ކުންފުންޏެކެވެ. އަދި ބާކީ ހިއްސާ އޮންނަނީ ޖިރޯނާ ފުޓްބޯލް ގްރޫޕްގެ ނަމުގައެވެ. މި ގްރޫޕް ލީޑު ކުރަނީ ސީ.އެފް.ޖީ. ގްރޫޕުން ގަނެފައިވާ މެންޗެސްޓަރ ސިޓީގެ މެނޭޖަރ ޕެޕް ގާޑިއޯލާގެ ބޭބެ، ޕެރޭ ގާޑިއޯލާއެވެ.