ފުއްގިރި މައްސަަލައިގައި ރައީސް ޔާމީނަށް ދައުލަތުން އުފުލާފައިވާ ދައުވާގައި، ޝަރީއަތް ފެށުމުގެ ކުރިން ކްރިމިނަލްކޯޓުން ނިންމާފައިވާ ނިންމުންތައް ރައީސް ޔާމީނުގެ ފަރާތްޕުޅުން ހައިކޯޓުގައި އިސްތިއުނާފްކޮށް ނާކާމިޔާބުވެ ވަޑައިގެންނެވުމަށްފަހު، އެމައްސަލަ ސްޕްރީމްކޯޓުގައިވެސް އިސްތިޢުނާފުކޮށް ރައީސް ޔާމީނަށް ނާކާމިޔާބުވެ ވަޑައިގެންފިއެވެ.

ރައީސް ޔާމީނުގެ ފަރާތުން ހައިކޯޓާއި ސްޕްރީމްކޯޓަށް ހުށައެޅީ، ޝަރީއަތް ފެށުމުގެ ކުރިން ބާއްވާ އިބްތިދާއީ އަޑުއެހުންތަކުގައި ކްރިމިނަލްކޯޓުން ނިންމާފައިވާ ބައެއް ނިންމުންތައް ބާޠިލްކުރުމަށެވެ. ދަށުކޯޓުގެ ނިންމުމަށް ތާޢީދުކޮށް ހައިކޯޓުން ޙުކުމްކޮށްފައިވާ އިރު، މިރޭ ދިވެހިރާއްޖޭގެ ސްޕްރީމްކޯޓުންވެސް ވަނީ ދަށު މަރުހަލާގެ ދެކޯޓުގެ ނިންމުމަށްވެސް ތާޢިދުކޮށް ހުކުމްކޮށްފައެވެ. އެހެން ނަމަވެސް ހައިކޯޓުގެ ޙުކުމްގައި ފާހަގަކޮށްފައިވާ ބައެއް ނުކުތާތައް ސްޕްރީމް ކޯޓުން ބާޠިލްކުރިއެވެ.

ރައީސް ޔާމީނުގެ ފަރާތްޕުޅުން ހުށައެޅި އިސްތިޢުނާފުގެ މައްސަލަގައި ސްޕްރީމްކޯޓުން ވަކިގޮތެއް ކަނޑައަޅަންދެން އެމައްސަލަ ކުރިޔަށް ނުގެންދިޔުމަށް ސްޕްރީމްކޯޓުން އަންގާފައިވާތީ، ފުއްގިރި މައްސަލައިގައ ރައީސް ޔާމީނާއި ދެކޮޅަށް ކުރާ ދަޢުވާ އޮތީ ހުއްޓިފައެވެ.

ރައީސް ޔާމީނުގެ ފަރާތުން ހައިކޯޓާއި ސްޕްރީމް ކޯޓަށް ހުށައެޅި މައިގަނޑު ދެނުކުތާގެ ތެރޭގައި ހިމެނެނީ ދައުލަތުން ހުށައެޅި ހެކިންގެ ތެރެއިން ޢަދީބާއި ޒިޔަތު ހެކިންގެ ގޮތުގައި ބަލައި ނުގަތުމަށާއި ދައުލަތުން  ހުށައެޅި ސިއްރު ހެއްކާއި ބެހޭ މައުލޫމާތު ހޯދުމަށެވެ.

ފުއްގިރިމައްސަލައިގައި މަތީ މަރުހަލާގެ ދެކޯޓުންވެސް ރައީސް ޔާމީނާއި ދެކޮޅަށް މައްސަލަ ނިމުނު އިރު މިހާރުވެސް އެމަނިކުފާނު ގެންދަވަނީ 11 އަހަރުގެ ޖަލު ޙުކުމެއް ތަންފީޒް ކުރައްވަމުންނެވެ. އެއީ ވ.އާރަށް ކުއްޔަށް ދިނުމުގައި ރިޝްވަތު ނައްގަވައި އެފައިސާ ލޯންޑަރ ކުރައްވާފައިވާ ކަމުގެ ތުހުމަތުގައި ދައުލަތުން ރައީސް ޔާމީނާއި ދެކޮޅަށް އުފުލި ދައުވާ ސާބިތު ވެގެންނެވެ.