އައިސީސީ ކްރިކެޓް ވޯލްޑް ކަޕްގައި ގްރޫޕްގެ އެއްވަނައިގައި އޮތް އިންޑިއާ އާއި ދެވަނައިގައި އޮތް ސައުތު އެފްރިކާ ބައްދަލުކުރި މެޗު، ހީކުރިގޮތާ މުޅިން ހިލާފަށް ވަރަށް ފަސޭހަކަމާއެކު އިންޑިއާއިން ކާމިޔާބުކޮށްފިއެވެ. އިންޑިއާއިން މެޗު ކާމިޔާބުކުރީ 243 ލަޑުންނެވެ. 

މި މެޗު ވެގެން ގޮސްފައިވަނީ އިންޑިއާގެ ތަރި ވިރާތު ކޯލީއަށް އެކިގޮތްގޮތުން ވަރަށް ހާއްސަ މެޗަކަށެވެ. އެގޮތުން ކޯލީގެ 35 ވަނަ އުފަންދުވަހު ކުޅުނު މި މެޗުގައި އޭނާ މި ވަނީ މި މުބާރާތުގައި އަނެއްކާ ވެސް "ސެންޗަރީ" އެއް ހަދާ، އޭނާގެ ވަން-ޑޭ-އިންޓަނޭޝަނަލް (އޯޑީއައި) ތަކުގެ ޖުމްލަ "ސެންޗަރީ" ގެ އަދަދު 49 އަކާ ހަމަކޮށްފައެވެ. މިއީ އޯޑީއައި އެއްގައި އެންމެ ގިނައިން "ސެންޗަރީ" ހަދާފައިވާ ކުޅުންތެރިޔާއާ އެއްހަމަ އަދަދެކެވެ.

އިންޑިއާއިން މެޗު ފެށީ ވަރަށް ވަރުގަދަކޮށެވެ. އެގޮތުން ރޯހިތް ޝަރްމާއާއި ޝުބްމަން ގިލް މޮޅު ކުޅުމެއް ދެއްކިއިރު، ޝްރެޔަސް އިޔާ ވަނީ "ހާފް ސެންޗަރީ" އެއް ހަދާފައެވެ. އަދި ކޯލީއަށްފަހު ކުޅެން ނިކުތް ސްރްޔާ ކުމާރު ޔާދަވް އާއި ރަވެންދްރަ ޖަޑެޖާ ވެސް ވަނީ 300 ލަނޑު ހެދުމުގައި މޮޅު ކުޅުމެއް ކުޅެފައެވެ. 

ފީލްޑިންގްގައި ސައުތު އެފްރިކާއިން ހުޝިޔާރުކަމާއެކު ކުޅުނު ނަމަވެސް، ފޯމުގައި އޮތް އިންޑިއާ މައިތިރިކުރެވޭ ފޯމިއުލާއެއް އެމީހުންނަކަށް ނުހޯދުނެވެ. އަދި ބެޓިންގގައި 27 އޯވަރުން އެންމެ 83 ލަނޑު ހެދިފައިވަނިކޮށް، އިންޑިއާއިން ވަނީ ސައުތު އެފްރިކާގެ މައްޗަށް ކުރިހޯދާފައެވެ.

މި މެޗަށްފަހު ލީގުގެ އެއް ވަނައިގައި 16 ޕޮއިންޓާއެކު އޮތީ އިންޑިއާއެވެ. އަދި ދެވަނައިގައި 12 ޕްއިންޓާއެކު އޮތީ ސައުތް އެފްރިކާއެވެ.