ޖަރުމަން ބުންޑަސް ލީގުގައި ހޮނިހިރު ދުވަހު ބެޔާން މިއުނިކުން ބޮރޫޝިއާ ޑޯޓްމަންޑާ ބައްދަލުކުރި މެޗު 4-0 ކާމިޔާބުކުރިއިރު، އެ ޓީމުގެ އިންގްލަންޑް ފޯވާޑް، ހެރީ ކޭން މިވަނީ އަނެއްކާވެސް ހެޓްރިކެއް ހަދާފައެވެ. އޭނާވަނީ މިދިޔަ ހަފްތާގެ މެޗުގައި ވެސް ހެޓްރިކެއް ހަދާފައެވެ.

ލީގުގައި މިހާތަނަށް 10 މެޗު ކުޅުނުއިރު ކޭން މިހާރުވެސް 15 ގޯލު ޖަހައިފިއެވެ. މީގެ އިތުރުން، މިއީ މި ސީޒަނުގައި ބެޔާންއަށް ބަދަލުވި ކޭން، އެ ޓީމަށް ކާމިޔާބުކޮށްދިން ތިންވަނަ ހެޓްރިކެވެ. 

އަދި ޑޯޓްމަންޑް ކޮޅަށް ކާމިޔާބުކުރި ގޯލުތަކާއެކު، ހެރީ ކޭންއަކީ ޖަރުމަނު ލީގުގައި 10 މެޗުން އެންމެ ގިނަ ގޯލު ކާޟިޔާބުކޮށްފައިވާ ކުޅުންތެރިޔާއެވެ. މީގެ ކުރިން މި ރެކޯޑް އޮތީ 10 މެޗުން 13 ގޯލު ކާމިޔާބުކުރި ކްލައުސް މަޓިޝަކް އަތުގައެވެ. މަޓިޝެކްގެ މި ރެކޯޑަކީ މީގެ 60 ހަކަށް އަހަރު ކުރިން، 1963/64 ގެ ސީޒަނުގައި އޭނާ ހޯދި ކާމިޔާބީއެކެވެ.