ގެދޮރުވެރިޔާ ސްކީމުން މާލެ ސަރަހައްދުން ދޫކުރާ ފުލެޓަށް އެދި ހުށަހެޅި ފަރާތްތަކުގެ ދާއިމީ ލިސްޓަށް ޝަކުވާ ހުށައެޅުމުގެ ފުރުޞަތު މިއަދު ހުޅުވާލައިފިއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން މިއަދު، ފްލެޓްތައް ލިބޭ މީހުންގެ، ދާއިމީ ލިސްޓަށް ޝަކުވާ ހުށައެޅުމުގެ ފުރުޞަތު ހުޅުވާލީ، ފްލެޓު ލިބޭ މީހުން ކަނޑައެޅުމުގައި ޕޮއިންޓް ދީފައިވާ ގޮތާއި ގުޅިގެން ގިނަ ބަޔަކު ނުރުހުންފާޅުކޮށް، ހައުސިންގ މިނިސްޓްރީއަށް ވަދެ އަޑުގަދަކޮށް ހަމަނުޖެހުންތައް ހިންގާފައި ވަނިކޮށެވެ. ފްލެޓް ދިންގޮތާއި މެދު ހިތްހަމަނުޖެހިގެން ހައުސިންގ މިނިސްޓްރީއަށް ވަތް މީހުން މައިތިރިކޮށްފައި ވަނީ އެމިނިސްޓްރީއަށް ފުލުހުން ގޮސްގެނެވެ.

ހައުސިންގ މިނިސްޓްރީން މިއަދު ފްލެޓްތައް ލިބޭ މީހުންގެ ދާއިމީ ލިސްޓަށް ޝަކުވާ ހުށައެޅުމުގެ ފުރުޞަތު ހުޅުވާލި އިރު، އެމިނިސްޓްރީން ބުނީ، މިމަހުގެ 9 ވަނަ ދުވަހާއި ހަމައަށް ޝަކުވާ ހުށައެޅޭނެ ކަމަށެވެ. އަދި ޝަކުވާ ހުށައަޅަން ޖެހޭނީވެސް ޕޯޓަލް މެދުވެރިކޮށް ކަމުގައި، އެމިނިސްޓްރީން ވަނީ ބުނެފައެވެ.

ހައުސިންގ މިނިސްޓްރީން ބުނެފައި ވަނީ، ފުރަތަމަ ދޫކުރާ 4000 ފްލެޓް ލިބޭ މީހުންގެ ތެރޭގައި ނުހިމެނޭ އެކަމަކު ފްލެޓަށް ޝަރުޠު ހަމަވެފައިވާ ހުރިހާ ފަރާތްތަކަށްވެސް ފްލެޓް ލިބޭނެ ކަމުގެ ލިޔުމެއް އެމިނިސްޓްރީން ދޭނެ ކަމަށެވެ.