ގެދޮރުވެރިޔާ ސްކީމުން މާލެ ސަރަހައްދުން ފުލެޓަށް އެދި ހުށަހެޅި ފަރާތްތަކަށް ޕޮއިންޓް ދީފައިވާ ގޮތާއި މެދު ހިތްހަމަ ނުޖެހުން ފާޅުކޮށްފިއެވެ.

ގެދޮރުވެރިޔާ ސްކީމުން ފްލެޓް ލިބޭ މީހުންނަށް ދޫކުރާ ފުރަތަމަ 4000 ފްލެޓްގެ ތެރޭގައި ނުހިމެނުނު ބައެއް މީހުން މިއަދު ވަނީ ހައުސިންގ މިނިސްޓްރީއަށް ވަދެ ނުރުހުން ފާޅުކޮށްފައެވެ. ނުރުހުން ފާޅުކުރި ގިނަ މީހުންގެ ޝަކުވާއަކީ، ޕޮއިންޓް ދީފައިވާ ގޮތް ސާފުވެފައި ނެތުމާއި، ޕޮއިންޓް މަދުވުމުގެ ޝަކުވާއެވެ. އަދި ބައެއް ފަރާތްތަކުން ދޮގު މައުލޫމާތު ހުށައަޅައިގެން ގިނައިން ޕޮއިންޓް ހޯދާފައިވާ ކަމަށާއި އަދި، ޕޮއިންޓް ދިނުމުގައި، ވަކިބަޔަކަށް ފްލެޓް ލިބޭ ގޮތަށް އޮޅުވާލާފައިވާކަމަށްވެސް ނުރުހުން ފާޅުކުރި މީހުން ވަނީ ތުހުމަތުކޮށްފައެވެ.

ހައުސިންގ މިނިސްޓްރީއަށް އެއްވި މީހުންނާއި ބައްދަލުކުރައްވައި، އެމިނިސްޓްރީީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ، ފްލެޓް ލިބޭ މީހުން ކަނޑައަޅާފައި ވަނީ، ޕޮއިންޓް ލިބިފައިވާ ގޮތަށް ބަލައިގެން ކަމަށެވެ. އަދި ޕޮއިންޓް ދިނުމުގައި އަމަލުކުރާ އުސޫލާއި މާކްސް ކުރިންވެސް މިނިސްޓްރީ ހާމަކޮށްފައިވާކަން އޭނާ ފާހަގަކުރެއްވިއެވެ.

ފުރަތަމަ ދޫކުރާ 4000 ފްލެޓް ނުލިބޭ މީހުންގެ މައިގަނޑު ޝަކުވާއަކީ، ޕޮއިންޓް ދިނުމުގައި މިނިސްޓްރީ އިންސާފުވެރި ނޫންކަމެވެ. މިގޮތުން، އެއްހާލަތެއްގައިވާ ދެމީހަކަށް ދެމިންވަރަށް ޕޮއިންޓް ލިބިފައިވުމާއި އެނޫންވެސް އެފަދަ މައްސަަލަތައް އެފަރާތްތަކުން ފާހަގަކޮށްފައިވެއެވެ.

ހައުސިންގ މިނިސްޓްރީން ހާމަކޮށްފައިވާ ގޮތުގައި، 3 ކޮޓަރީގެ ފުލެޓްގެ ދާއިމީ ލިސްޓްގައި ހިމެނޭ ފަރާތްތަކުގެތެރެއިން ފަހިދިރިއުޅުން ކޯޕަރޭޝަނުން މިހާރު އިމާރާތްކުރަމުންގެންދާ 4000 ފުލެޓް ލިބޭ ފަރާތްތަކުގެ ތެރޭގައި ހިމެނެނީ 76 އިން ފެށިގެން މަތިން މާރކްސް ލިބިފައިވާ ފަރާތްތަކަށެވެ. އަދި 2 ކޮޓަރީގެ ފުލެޓްގެ ދާއިމީ ލިސްޓްގައި ހިމެނޭ ފަރާތްތަކުގެތެރެއިން ފަހިދިރިއުޅުން ކޯޕަރޭޝަނުން މިހާރު އިމާރާތްކުރަމުންގެންދާ 4000 ފުލެޓް ލިބޭ ފަރާތްތަކުގެ ތެރޭގައި ހިމެނެނީ 73 އިން ފެށިގެން މަތިން މާކްސް ލިބިފައިވާ ފަރާތްތަކަށް ކަމުގައިވެސް އެމިނިސްޓްރީން ވަނީ ވިދާޅުވެފައެވެ.

ގެދޮރުވެރިޔާ މަޝްރޫޢުގެ ތެރެއިން ފްލެޓަށް ހުޅުވާލި ފުރުޞަތުގައި، 20000 ވުރެ ގިނަ މީހުން ފްލެޓަށް އެދި ހުށައެޅިއެވެެ. އޭގެތެރެއިން 13000 މީހުންގެ ޝަރުޠުހަމަވާކަމަށް ހައުސިންގ މިނިސްޓްރީން ކުރިން ހާމަކުރައްވާފައިވެއެވެ.