އިދިކޮޅު ޕާޓީތަަކުން ފޮރިން މިނިސްޓަރ އަބުދުﷲ ޝާހިދުގެ ޢިތުބާރު ނެތްކަމުގެ މައްސަލަ މިއަދު މެންދުރު ހުށައެޅުމަށް ފަހު ހަވީރު ނުވަނީސް މައްސަލަ އަނބުރާ ނަގައިފިއެވެ.

ރައްޔިތުންގެ މަޖިލީހުގެ އިދާރާއިން ވިދާޅުވީ އިދިކޮޅު ފަރާތްތަކުން ހުށައެޅި ޝާހިދުގެ އިތުބާރުނެތްކަމުގެ މައްސަލަ އަނބުރާ ގެންދިޔައިރު އެމައްސަލަ އަނބުރާ ނެގީ ކީއްވެކަން މައްސަލަ ހުށައެޅި ފަރާތުން އަންގާފައި ނުވާ ކަމަށެވެ.

ޝާހިދުގެ އިތުބާރު ނެތްތަކުގެ މައްސަލަ މަޖިލީހަށް ވެއްދީ، ރައްޔިތުންގެ މަޖިލީހުގެ 13 މެމްބަރަކު ސޮއެކުރައްވައިގެންނެވެ. އޭގެ ތެރޭގައި ހިމެނެނީ ޕީޕީއެމްގެ މެމްބަރުންނާއި، ޕީއެންސީގެ މެމްބަރުންނާއި ޖުމްހޫރީޕާޓީގެ އެއް މެމްބަރެވެ. ޖުމްހޫރީ ޕާޓީގެ މެމްބަރުންގެ ތެރެއިން ޝާހިދު މަޤާމުން ވަކިކުރެއްވުމަށް އިތުބާރުނެތްކަމުގެ މައްސަލައިގައި ސޮއެ ކުރައްވާފައި ވަނީ ކެންދޫ ދާއިރާގެ މެމްބަރު ޢަލީ ޙުސައިނެވެ.

އިދިކޮޅުން ބަންޑާރަ ނައިބު އިބްރާހީމް ރިއްފަތާއި، ފޮރިންގ މިނިސްޓަރ ޢަބުދުﷲ ޝާހިދުގެ އިތުބާރު ނެތްކަމުގެ މައްސަަލަ މަޖިލީހަށް ހުށައެޅީ މޮރިޝަސް އާއި ރާއްޖެއިން ކަނޑުގެ އިން ވަކިކުރި މައްސަލައިގައި ރާއްޖޭގެ ކަނޑުން ބައެއް ދޫކޮށްލީ ކަމަށް ބުނެ ކުރާ ތުހުމަތު ތަކާއި ގުޅުވައިގެންނެވެ.

މަޖިލީހަށް އިތުބާރު ނެތްކަމުގެ މައްސަލަ އިދިކޮޅު ފަރާތްތަކުން ވެއްދި ނަމަވެސް އެފަރާތްތަކަށް މިނިސްޓަރަކު މަޤާމުން ވަކިކުރުމަށް ބޭނުންވާ އަދަދަށް ވޯޓު ނުލިބޭނެ ކަމުގައި އިދިކޮޅު މެމްބަރުންވެސް ވިދާޅުވެއެވެ.

މިނިސްޓަރެއްގެ ޢިތުބާރުނެތްކަމުގެ މައްސަލަ މަޖިލީހުން ފާސްކޮށް މަޤާމުން ވަކިކުރެވޭނީ 43 މެމްބަރުންގެ ވޯޓު ލިބިގެންނެވެ. އެހެންނަމަވެސް އެއަދަދާއި ގާތްކުރާ އަދަދަކަަށްވެސް ރައްޔިތުންގެ މަޖިލީހުގައި އިދިކޮޅު މެމްބަރުންނެއް ނެތެވެ.

ފޮރިން މިނިސްޓަރ ޢަބުދުﷲ ޝާހިދުގެ އިތުބާރުނެތްކަމުގެ މައްސަލަ ރައްޔިތުންގެ މަޖިލީހަށް ހުށައެޅި އިރު މިހާރުވެސް އެމަނިކުފާނު ހުންނެވީ ރަސްމީ ދަތުރުފުޅެއްގައި ވަޑައިގެން ޖަޕާނުގައެވެ.