Advertisement
ސިފައިން މިއަދު ހެނދުނު ފެން ހިއްކުމުގެ މަސައްކަތުގައި ---
މާލޭގައި ފެންބޮޑުވެ ސިފައިން ފެން ހިއްކުމުގެ މަސައްކަތްކޮށްފި
މިއަދު ހެނދުނު ބޯކޮށް ވާރޭވެހި މާލޭގެ މަގުތަކުގައި ފެން ބޮޑުވުމާ ގުޅިގެން ސިފައިން ނުކުމެ ފެން ހިއްކައިފިއެވެ.
އެމްއެންޑީއެފުން ބުނީ، ސިފައިން ނުކުމެ ފެންހިއްކުމުގެ މަސައްކަތް ކުރީ، ފެންހިއްކުން އަވަސްކުރުމަށް އެހީތެރިވުމުގެ ގޮތުން ކަމަށެވެ.
މާލޭގެ އަމީނީ މަގާއި އައިޖީއެމްއެޗް ސަރަހައްދުގައި ވިއްސާރަ މޫސުމުގައި އާއްމުކޮށް ބޮޑަށް ފެންބޮޑު ވާތީ، އެސަރަހައްދުގައި ވަނީ ސްޓޯމްވޯޓަރ ޕަމްޕްތައްވެސް ބަހައްޓާފައެވެ. އެހެން ނަމަވެސް މިއަދު މާލޭގެ މަގުތަކުގައި ފެންބޮޑުވީ، ސްޓޯމްވޯޓަރ ޕަމްޕްތަކަށް އޮބި ނޯންނަ ވަރަށް ބޯކޮށް ވާރޭ ވެހުމުގެ ސަބަބުންނެވެ.
މިހާރު ކުރަމުންދާ ވިއްސާރައިގައި މިއަދު މާލެ ސިޓީއަށް ބޯކޮށް ވާރޭވެހި މާލޭގެ މަގުތަކުގައި ފެން ބޮޑުވުމާ ގުޅިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ފައިޓަރުން ވަނީ، މިއަދު ހެނދުނު 9:40 ހާއިރު އައިޖީއެމް ހޮސްޕިޓަލް ސަރަހައްދުގައި ޕަންޕު ބޭނުންކޮށްގެން ފެން ހިއްކުމުގެ މަސައްކަތް ކޮށްފައެވެ.
މާލޭގެ ބޮޑެތި މަގުތަކުގައި ބޮޑުވި ފެންގަނޑު މިހާރު ހިންދާލާފައި ވާއިރު، މޫސުމާއި ބެހޭ ޤައުމީ އިދާރާއިން ވަނީ، މެދު ރާއްޖެތެރެއާ އުތުރުގެ އަތޮޅުތަކަށް ބޯކޮށް ވާރޭ ވެހެނެ ކަމަށް ލަފާކޮށް ވައިޓް އެލާޓް ނެރެފައެވެ.
