މިހާރު ކުރިޔަށްދާ އައިސީސީ ކްރިކެޓް ވޯލްޑް ކަޕްގައި ބުރާސްފަތި ދުވަހު އިންޑިއާއާއި ސްރީލަންކާ ބައްދަލުކުރި މެޗު ބޮޑު ތަފާތަކުން އިންޑިއާ ކާމިޔާބުކޮށްފިއެވެ. އިންޑިއާއިން މި މެޗު ކާމިޔާބު ކުރީ 302 ލަނޑުންނެވެ.  

ފުރަތަމަ އިނިންގްސްގައި އިންޑިއާއިން ކުޅެން ނިކުމެ، އެ ޓީމުގެ ވިރާތް ކޯލީއާއި ޝުބްމަން ގިލް އަދި ޝްރެޔަސް އިޔާ ވަނީ ކޮންމެ ކުޅުންތެރިއަކު "ހާފް ސެންޗަރީ" ނުވަތަ 50 ލަނޑު ހަދާފައެވެ. މީގެ ބޭނުން އިންޑިއާގައި އެންމެ މޮޅަށް ބޯޅަ އުކާ ކުޅުންތެރިން ހިފިއެވެ. އެގޮތުން ސްރީލަންކާއިން 55 ލަނޑު ހެދިއިރު، އެ ޓީމުގެ ހުރިހާ ކުޅުންތެރިން ނުބައިކޮށް އިންޑިއާއިން މެޗު ކާމިޔާބުކުރިއެވެ.

އިންޑިއާގެ މުޙައްމަދު ޝާމީގެ މޮޅު ބޯވލިންގް ހުނަރާއެކު، މިހާރު ކްރިކެޓް ވޯލްޑް ކަޕްގައި އިންޑިއާއިން އެންމެ ގިނަ ވިކެޓް ނަގާފައިވާ ކުޅުންތެރިއަކީ އޭނާއެވެ. އިންޑިއާ ޓީމުގެ މި ރެކޯޑް އޭނާ މި ހާސިލްކުރީ އެންމެ 14 މެޗުންނެވެ.

މި މެޗުގައި އިންޑިއާގެ ޖަސްޕްރިތު ބުމްރާ އާއި މުހައްމަދު ސިރާޖް ވެސް ދެވަނަ އިނިންގްސްގައި މޮޅު ކުޅުމެއް ދެއްކިއެވެ. ސްރީލަންކާއަށް އެންމެ 55 ލަނޑު ހެދިފައިވަނިކޮށް އެ ޓީމު ހުރިހާ ކުޅުންތެރިން މުޙައްމަދު ޝާމީ ނުބައިކުރިއިރު، އޭނާގެ ކުރިން ޖަސްޕްރިތު ބުމްރާ އާއި މުހައްމަދު ސިރާޖް ވަނީ ބޯލިންގގައި އެ ޓީމުން މެޗުގެ ކޮންޓްރޯލް ނަގާފައެވެ.

އިންޑިއާގެ މި ކާމިޔާބީއަކީ ވަން-ޑޭ-އިންޓަނޭޝަނަލެއްގައި 4 ވަނައަށް އެންމެ ބޮޑު ތަފާތަކުން ނިމުނު މެޗެވެ. މީގެ އިތުރުން މިއީ ވޯލްޑް ކަޕްގައި ދެވަނައަށް އެންމެ ބޮޑު ތަފާތަކުން ނިމިގެން ދިޔަ މެޗެވެ. މިހާތަނަށް އެންމެ ބޮޑު ތަފާތަކުން ވޯލްޑް ކަޕްގައި މެޗެއް ކާމިޔާބުކޮށްފައިވަނީ އޮސްޓްރޭލިއާއިންނެވެ. އެއީ ނެދަލޭންޑްސްއާ ދެކޮޅަށް މީގެ ހަފްތާއެއް ކުރިންނެވެ.