Advertisement
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު --
ރައީސް ނަޝީދުގެ އިތުބާރު ނެތްކަމުގެ މައްސަލަ އާދިއްތަ ދުވަހަށްވެސް އެޖެންޑާކޮށްފި
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ޢިތުބާރު ނެތްކަމުގެ މައްސަލަ މިއަންނަ އާދިއްތަ ދުވަހަށްވެސް އެޖެންޑާކޮށްފިއެވެ.
ރައްޔިތުންގެ މަޖިލީހުގެ ޖަލްސާތައް އާއްމުގޮތެއްގައި ބާއްވަނީ، ހޯމަ އިން ބުދަ އަށް ނަމަވެސް، ރައްޔިތުންގެ މަޖިލީހުގެ ރައީސް ގެ އިތުބާރު ނެތްކަމުގެ މައްސަލަ ހުށައެޅިފައި ވުމާއިއެކު، އެޖަލްސާ ބޭއްވޭތޯ ރައްޔިތުންގެ މަޖިލީހުން އަންނަނީ، ރަސްމީ ބަންދު ނޫން ކޮންމެ ދުވަހަކުވެސް ޖަލްސާ ބޭއްވުމަށް މަސައްކަތް ކުރަމުންނެވެ.
ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މަޖިލީހުގައި ކުރިޔަށް ނުގެންދެވިގެން އުޅެނީ، މަޖިލީހުގެ ނައިބު ރައީސް އީވާ އަބުދުﷲ، ތަކުރާރުކޮށް މަޖިލީހަށް ސަލާމް ފޮނުއްވަމުން ގެންދަވާތީއެވެ. އީވާ މަޖިލީހަށް ސަލާމް ފޮނުއްވަމުން ގެންދަވަނީ، ޑެންގީހުންޖެހި ބަލި ރަނގަޅު ނުވާކަމަށް ބުނެއެވެ. އެހެން ނަމަވެސް އީވާ މަޖިލީހުގެ ޖަލްސާއަށް ވަޑައިނުގަންނަވަނީ، ބޭބޭފުޅު ނަޝީދުގެ އިތުބާރު ނެތްކަމުގެ ވޯޓުނެގުމަށް މަޖިލީހުގައި ފުރުޞަތު ދޭން ބޭނުން ނުވާތީކަމުގައި ރައްޔިތުންގެ މަޖިލީހުގެ އެމްޑީޕީގެ މެމްބަރުން ތުހުމަތު ކުރައްވައެވެ.
ޑެންގޫހުން ޖެހިގެން އީވާ މަޖިލީހަށް ވަޑައި ނުގެން ސަލާމް ފޮނުއްވަމުން ގެންދާއިރު، ރައީސް ނަޝީދުގެ އިތުބާރު ނެތްކަމުގެ މައްސަލައިގެ ނޯޓިސް ހަމަވުމުގެ ކުރިން، އީވާ ވަނީ ޑެންގޫހުން ޖެހިފައި ހުއްޓައިވެސް މަޖިލީހުގެ ޖަލްސާއަށް ވަޑައިގެން މަޖިލީހުގެ ރިޔާސަތު ބަލަހައްޓަވާފައެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ މަައްޗަށް އިތުުބާރު ނެތްކަމުގެ މައްސަލަ ހުށައެޅުނު މިއީ ދެވަނަ ފަހަރެވެ. ފުރަތަމަ ފަހަރު، ހުށައެޅުނު އިތުބާރު ނެތްކަމުގެ މައްސަލަ ހުއްޓުވީ، މަޖިލީހުގެ ދާއިމީ ކޮމިޓީތައް އެކުލަވާލުން ފަސްކުރައްވައިގެންނެވެ.
