ޣައްޒާގެ އުތުރަށް ވަދެގަތް އިޒްރާއީލް ސިފައިންނާއި ކުރިމަތިލައި، ހަމާސްގެ މުޖާހިދުން އިޒްރޭލު ސިފައިންގެ 9 މީހުން މަރާލާފައިވާ ކަމަށް އިޒްރާއީލުން އެއްބަސްވެއްޖެއެވެ.

އިޒްރާއީލުން ބުނެފައި ވަނީ އިއްޔެއަކީ ޣައްޒާ ހަނގުރާމައިގައި އިޒްރޭލަށް އެންމެ ބޮޑު ގެއްލުމެއް ކުރިމަތިވި ދުވަސް ކަމަށެވެ. ހަމާސްގެ މުޖާހިދުންގެ ހަމަލާތަކުގައި މަރުވިކަމަށް އިޒްރޭލުގެ އަސްކަރިއްޔާއިން ބުނި 9 ސިފައިންގެ މީހުންގެ ތެރޭގައި ހިމެނެނީ، މުޅިންވެސް އުމުރުން 25 އަހަރު ނުވާ ޒުވާނުންނެވެ. ހަމަލާތަކުގައި މަރުވި އިޒްރޭލު ސިފައިންގެ އެންމެ ހަގު މީހާގެ އުމުރަކީ 19 އަހަރެވެ. މަރުވި މީހުންގެ ވަނަވަރު އިޒްރޭލުގެ އަސްކަރިއްޔާއިން ހާމަކޮށްފައިވާއިރު އޭގެ ތެރޭގައި ހިމެނެނީ 19 އަހަރުގެ އެކަކާއި، 20 އަހަރުގެ 4 މީހުންނާއި، އެކާވީސް އަހަރުގެ މީހަކާއި 24 އަހަރުގެ މީހެކެވެ. އޭގެތެރެއިން އެކަކުގެ އުމުރު އިޒްރޭލުން ހާމަކޮށްފައެއް ނުވެއެވެ.

ކުރިމަތިލުންތަކުގައި އިޒްރޭލުގެ 9 މީހުން މަރުވި ކަމަށް، އިޒްރޭލުގެ އަސްކަރިއްޔާއިން ބުނެފައި ވާއިރު، ހަމާސްގެ މުޖާހިދުން ބުނެފައި ވަނީ ދަންތުރައެއްގައި ޖައްސައި އެއްފަހަރާ އިޒްރޭލު ސިފައިންގެ 20 ވުރެ ގިނަ މީހުން އެއްފަަހަރާ މަރާލާފައިވާ ކަމަށެވެ.

އިއްޔެ ޣައްޒާގައި އިޒްރޭލަށް ލިބުނު ބޮޑު ގެއްލުމާއި އެކު އިޒްރޭލުގެ ބޮޑު ވަޒީރު ނަތަންޔާހޫ ވަނީ ކެބިނެޓާއި އެކު ކުއްލި ބައްދަލުވުމެއް ބާއްވާފައެވެ. އަދި އިޒްރާއީލުގެ އަސްކަރިއްޔާއިން ރޭވަނީ ޖަބަލިޔާ ރެފިއުޖީކޭންޕަށް ބާރުގަދަ 6 ބޮން ވައްޓާލައި 400 ވުރެ ގިނަ މީހުން ޝަހީދުކޮށްލާފައެވެ.