ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާކޮށްފައި އޮތް މިއަދު ޖަލްސާއަށްވެސް، މަޖިލީހުގެ ނައިބުރައީސާ އީވާ އަބުދުﷲ މަޖިލީހަށް ސަލާމް ފޮނުވުމުން ކެންސަލްވެއްޖެއެވެ.

އީވާ، ވިދާޅުވެފައި ވަނީ، ޑެންގޫ ހުން ޖެހި އާލާސްކަންފުޅާ އުޅުއްވާ ކަމަށެވެ. އެހެން ނަމަވެސް އީވާ ޑެންގޫއަށް ޕޮޒިޓިވްވި ކަމަށް ބުނެފައިވާ ދުވަހާއި ވިދިގެން އައި ދުވަހުވެސް އީވާ ވަނީ، މަޖިލީހަށް ނުކުމެވަޑައިގެން ރިޔާސަތު ބަލަހައްޓަވާފައެވެ.

ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅިފައި ވަނިކޮށް އެމައްސަލަ ކުރިޔަށް ނުގެންގޮސް މަޖިލީހުގެ އިތުރު ޖަލްސާއެއް ނުބޭއްވޭނެއެވެ. އެހެންވެ މަޖިލިސް މިހާރު އޮތީ މަރުތަޅެއް އެޅިފައެވެ.

އެމްޑީޕީގެ މެމްބަރުން ތުހުމަތު ކުރައްވާފައިވާ ގޮތުގައި އީވާ މަޖިލީހަށް ސަލާމް ފޮނުއްވަމުން ގެންދަވަނީ، ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހުގައި ކުރިޔަށް ގެންދިޔަ ނުދިނުމަށްޓަކައެވެ. 48 މެމްބަރުން ސޮއެކޮށް ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާފައި ވާއިރު، އެމައްސަލަ ކުރިޔަށް ގެންދިޔަ ނުދިނުމަށްޓަކައި ރައީސް ނަޝީދު އިސްވެ ހުންނަވައިގެން މަޖިލީހުގެ ނިޒާމް ޚަރާބުކުރައްވަނީ ކަމަށް، މެމްބަރުން ތުހުމަތު ކުރައްވައެވެ.

ރައީސް ނަޝީދަކީ، ދިވެހިރާއްޖެއަށް ޑިމޮކްރަސީ ގެނެސްދިނުމުގައި އެންމެ މުހިއްމު މަސައްކަތްތައް ކުރި ބޭފުޅާކަމުގައި ގިނަ ބަޔަކު ކުރިން ޤަބޫލު ކުރި ނަމަވެސް އެމްޑީޕީގެ އާއްމު މެމްބަރުންވެސް މިހާރު ރައީސް ނަޝީދަށް މުޚާތަބު ކުރަނީ އިންޑިއާ ކަނޑުގެ މުޤާބޭގެ ގޮތުގައެވެ.