ކުވައިތު ފަންޑުގެ އެހީގައި 7 ރަށެއްގައި އިމާރާތްކުރާ ހޮސްޕިޓަލްތަކުގެ އެއްބަސްވުންތަކުގައި މިއަދު ސޮއެކޮށްފިއެވެ.

ކުވައިތު ފަންޑުގެ އެހީގައި އަޅާ މިހޮސްޕިޓަލްތަކަކީ، 30 އެނދުގެ ހޮސްޕިޓަލްތަކެވެ. ހޮސްޕިޓަލު އެޅުމަށް ބީލަމަށް އިއުލާނުކުރުމުން އެކަމަށް ކުރިމަތިލި ފަރާތްތަކުގެ ބިޑްތައް އިވެލުއޭޓްކޮށް އެއްބަސްވުންތަކުގައި ސޮއެކުރުމުގެ ރަސްމިއްޔާތު ބާއްވާފައި ވަނީ މިއަދު މެންދުރުފަހު، މިނިސްޓްރީ އޮފް ހެލްތުގައެވެ.

މިރަސްމިއްޔާތުގައި ހެލްތު މިނިސްޓަރ އަހުމަދު ނަސީމް ބައިވެރިވެ ވަޑައިގެންނެވިއެވެ.

ކުވައިތު ފަންޑުގެ އެހީގައި 30 އެނދުގެ ހޮސްޕިޓަލްތައް އެޅުމަށް ހަމަޖައްސާފައިވާ ރަށްތަކުގެ ތެރޭގައި، ހިމެނެނީ، ހދ.ހަނިމާދޫ، ށ.މިލަންދޫ، ނ.ވެލިދޫ، ކ.ތުލުސްދޫ، އދ.މާމިގިލި، ވ.ފެލިދޫ އަދި ތ.ވިލުފުއްޓެވެ.

މިގޮތުން ހދ.ހަނިމާދޫ، އދ.މާމިގިލި، ވ.ފެލިދޫ އަދި ތ.ވިލުފުށީ ހޮސްޕިޓަލްގެ މަސައްކަތް ހަވާލުކޮށްފައި ވަނީ، ޑްޕްލެކްސް ޕްރައިވެޓް ލިމިޓެޑަށެވެ. އަދި ށ.މިލަންދޫ، ނ.ވެލިދޫ، ކ.ތުލުސްދޫ ހޮސްޕިޓަލްގެ މަސައްކަތް ހަވާލުކޮށްފައި ވަނީ، އާނަންޑް ބިލްޑްޓެކް ޕްރައިވެޓް ލިމިޓެޑަށެވެ. ކުވައިތު ފަންޑުން މި 7 ހޮސްޕިޓަލްގެ މަޝްރޫއުތަކަށް 689.08 މިލިޔަން ރުފިޔާ ދެއްވާފައިވާއިރު، މި ހޮސްޕިޓަލްތައް އިމާރާތްކޮށް ނިންމުމަށް ކުންފުނިތަކަށް ދެއްވާފައި ވަނީ 540 ދުވަހުގެ މުއްދަތެވެ.