އަންނަ އަހަރުގެ ދައުލަތުގެ ބަޖެޓުގެ ގޮތުގައި 49.5 ބިލިއަން ރުފިޔާގެ ބަޖެޓެއް ފިނޭންސް މިނިސްޓްރީން މަޖިލީހަށް ހުށަހަޅައިފިއެވެ.

މަޖިލީހުން މިއަދު އޮތީ ބަޖެޓު ހުށަހެޅުމުގެ ޖަލްސާ އެޖެންޑާކޮށްފައެވެ. ނަމަވެސް ބަންޑާރަ ނައިބުގެ ލަފާފުޅާ އެކު، ފިނޭންސް މިނިސްޓަރު ބަޖެޓު ހުށަހެޅުމަށް މަޖިލީހަށް ވަޑައެއް ނުގަންނަވައެވެ. ދައުލަތުގެ މާލިއްޔަތާ ބެހޭ ގާނޫނުގެ 32 ވަނަ މާއްދާގައިވާ ގޮތުން އަހަރަކަށް ލަފާކުރާ ދައުލަތުގެ ބަޖެޓް އެ އަހަރެެއް ފެށުމުގެ ދެ މަސްދުވަސް ކުރިން މަޖިލީހަށް ހުށަހަޅަން ޖެހެއެވެ.

ފިނޭންސް މިނިސްޓްރީން ބަޖެޓު މަޖިލީހަށް ފޮނުވީ އިއްޔެއެވެ. ފިނޭންސް މިނިސްޓްރީން އަންނަ އަހަރަށް ކަނޑައެޅި ބަޖެޓަކީ 2023 ވަނަ އަހަރަށް ފާސްކުރި 42.6 ބިލިއަން ރުފިޔާގެ ބަޖެޓަށް ވުރެ 6.9 ބިލިއަން ރުފިޔާ އިތުރު ބަޖެޓެކެވެ.

ސަޕްލިމެންޓްރީ ބަޖެޓު ފާސްކުރުމުން މި އަހަރުގެ ބަޖެޓް 49.3 ބިލިއަން ރުފިޔާއަށް އަރައެވެ. މި އަހަރު ނިމޭއިރު ދައުލަތުގެ ހަރަދު 47 ބިލިއަން ރުފިޔާއަށް އަރާނެ ކަމަށް ލަފާކުރެއެވެ. އަދި ދައުލަތުގެ އާމްދަނީ 32 ބިލިއަން ރުފިޔާއަށް އަރާނެ ކަމަށް ލަފާކުރެއެވެ.

އަންނަ އަހަރުގެ ބަޖެޓު އަދަދު ފިނޭންސް މިނިސްޓްރީން ހާމަކުރި ނަމަވެސް، ބަޖެޓުގެ ތަފްސީލު އެނގޭނީ، ފިނޭންސް މިނިސްޓަރު މަޖިލީހަށް ބަޖެޓު ހުށަހެޅުމުންނެވެ. ފިސްކަލް ސްޓްރެޓެޖީގައިވާ ގޮތުން އަންނަ އަހަރުގެ ބަޖެޓު ޑެފިސިޓް ފޫބެއްދުމަށް 13 ބިލިއަން ރުފިޔާ ހޯދަން ޖެހެއެވެ. އެއީ މި އަހަރުގެ ޑެފިސިޓަށް ވުރެ ދެ ބިލިއަން ދަށް އަދަދެކެވެ. މިއަހަރުގެ ބަޖެޓު ޑެފިސިޓް 15 ބިލިއަން ރުފިޔާއަށް އަރައެވެ.

އަންނަ އަހަރަށް ލަފާކޮށް ފިނޭންސުން ބަޖެޓު ހުށަހެޅިއިރު އިންތިހާބީ ރައީސް ޑރ. މުހައްމަދު މުއިއްޒުގެ އޮފީހުގެ ލަފާ ވެސް ވަނީ ހޯދާފައެވެ. އަދި, އެމަނިކުފާނު އެދިލެއްވި ކަންކަން ވެސް ބަޖެޓުގައި ހިމަނާނެ ކަމަށް ފިނޭންސުން މީގެކުރިން ހާމަކޮށްފައިވެއެވެ.