އެއްމެ ފަހުގެ ޒަމާނީ ޓެކްނޮލޮޖީ ހިމެނޭހެން ފަރުމާކޮށްފައިވާ ސްމާޓް ޕާކިންގ ޒޯނެއް އާބަންކޯއިން ހުޅުމާލޭގައި ހަދައިފިއެވެ.

އާބަންކޯއިން ބުނީ، ރައްޔިތުންނަށް ވީހާވެސް ލުއި ފަސޭހަ ސްމާޓް ސިޓީއެއް ހޯދައި ދިނުމުގެ އަޒުމުގައި އޮތް އާބަންކޯގެ ސްމާޓްކޮމް ބްރޭންޑްގެ ދަށުން ޕާކު ކުރުމުގެ ކަންކަމަށް އިންގިލާބީ ބަދަލުތަކެއް ގެނައުމުގެ އަމަލީ މަސައްކަތް ފަށާފައިވާ ކަމަށެވެ. އެގޮތުން ހުޅުމާލޭގެ ފެރީ ޓާމިނަލް ސަރަހައްދު ކައިރީގައިވާ ފިތުރޯނު ޕާކިން ޒޯން މިހާރު މިވަނީ ސްމާޓް ޕާކިން ޒޯނަކަށް ބަދަލުކުރެވިފައި ކަމުގައިވެސް އާބަންކޯއިން ވަނީ ބުނެފައެވެ. އަދި އަދި ވަރަށް އަވަހަށް މި ޒޯނުން ކާރު ޕާކު ކުރާނެ ޖާގަތައް ކުއްޔަށް ދޫކުރާނެކަމުގައިވެސް އާބަންކޯއިން ވަނީ ބުނެފައެވެ.

އެކުންފުނިން ބުނީ، ސްމާޓް މި ޕާކިންގ ޒޯނަކީ، އެއްމެ ފަހުގެ ޒަމާނީ ޓެކްނޮލޮޖީ ހިމެނޭހެން ފަރުމާކޮށްފައިވާ މި ޕާކިންގ ޒޯނެއް ކަމަށެވެ. މިގޮތުން، ޕާކިންޖާގަ ކަށަވަރުކޮށްގެން ޕާކު ކުރަން އަންނަ ކާރުތަކުގެ ނަމްބަރު ބޯޑު ކޮމްޕިއުޓަރ ވިޝަން އިނޭބަލްޑް ކެމެރާއަކުން ރީޑްވެގެން އޮޓޯ ބޫމް ގޭޓު ހުޅުވޭނެ ކަމަށާއި، މިގޮތަށް ހުށިޔާރުކަމާ އެކީގައި އޮޓޮމެޓިކުން ނަމްބަރު ބޯޑު ދެނެގަތުމަށް އެއްމެ ފަހުގެ ޓެކުނޮލޮޖީތަކުގެ ތެރޭގައި ހިމެނޭ އާޓިފިޝަލް އިންޓެލިޖެންސް (އޭ.އައި)، އަދި މެޝިން ލާރނިންގ (އެމް.އެލް) ބޭނުންކުރެވޭނެ ކަމުގައިވެސް އެކުންފުނިން ބުނެފައިވެއެވެ. މީގެ ސަބަބުން އިންސާނީ މުއާމަލާތަކާ ނުލައި އޮޓޮމެޓިކުން ފަސޭހަކަމާއެކު ކާރަށް ޕާކިން ޒޯނަށް ވަދެ އަދި ނިކުމެވޭނެ ކަމަށާއި، މީގެ އިތުރުން މި ޒޯނުގައި ޕާކު ކުރާ އުޅަނދުގެ ރައްކާތެރިކަން ކަށަވަރު ކުރުމަށްޓަކައި ސައްވީސް ގަޑި އިރު ސީ.ސީ.ޓީ.ވީ ކެމެރާ މެދުވެރިކޮށް މޮނިޓަރ ކުރެވޭނެކަމުގައިވެސް އާބަންކޯއިން ވަނީ ވިދާޅުވެފައެވެ.

ސިނަމާލެ ބުރިޖުން މާލެއާ ހުޅުމާލެ ގުޅާލައި އަދި ފަހުން ހުޅުމާލެ ފޭސް 2ގައި މީހުން އާބާދުވާން ފެށުމާއިއެކު، ހުޅުމާލޭގައި ޕާކުކުރުމުގެ މައްސަލަަތައް ވަނީ ވަރަށް ބޮޑުވެފައެވެ.