ލިވަޕޫލް ފުޓުބޯޅަ ކްލަބަށް ކުޅެމުންއަންނަ ކޮލަމްބިއާގެ މިޑްފިލްޑަރގެ މަންމަ އާއި ބައްޕަ މިދިޔަ ހޮނިހިރު ދުވަހު ކޮލަމްބިއާއިން ކިޑްނެޕްކޮށްފައިވަނިކޮށް، ފުލުހުން ހިންގި އޮޕަރޭޝަންތަކުގައި އޭނާގެ މަންމަ ސިލެނިސް މަރުލާންޑާ ވަނީ ހަމަ އެ ދުވަހު އެ ގައުމުގެ  އުތުރުގެ  ސަރަހައްދެއްކަމުގައިވާ  ބަރަންކާސްއިން  ސަލާމަތްކުރެވިފައެވެ. ނަމަވެސް މިހާތަނަށް އޭނާގެ ބައްޕަ ލުއިޒް މަނުއަލް ޑިއާޒް ފެނިގައެއް ނުވެއެވެ.

ލުއިސް ޑިއާޒްގެ ބައްޕަ ހޯދުމަށް ފުލުހުންނާއި ސިފައިން ގުޅިގެން ބޮޑު މިލިޓަރީ އޮޕަރޭޝަނެއް މިހާރު ފަށާފައިވާއިރު، މި އިދާރާތަކުންވަނީ ޑިއާޒްގެ ބައްޕަ ހޯދުމަށް މައުލޫމާތު ދޭ ފަރާތަކަށް 40،000 ޕައުންޑު ދޭނެކަމަށް އިއުލާންކޮށްފައެވެ. ފުލުހުންނާއި ސިފައިން ކުރިޔަށް ގެންދާ އޮޕަރޭޝަންގައި 120 ސިފައިންގެ އިތުރުން ގިނަ އަދަދެއްގެ ފުލުހުން އަންނަނީ ހަރަކާތްތެރިވަމުންނެވެ. 

ކޮލަމްބިއާގެ ސިފައިން ހާމަކޮށްފައިވާ ގޮތުގައި އެމީހުން ކުރިޔަށްގެންދާ އޮޕަރޭޝަންގައި ހެލިކޮޕްޓަރާއި ތަފާތު މިލިޓަރީ އާލާތްތައް އަންނަނީ ބޭނުންކުރަމުންނެވެ. 

Advertisement

މީގެ އިތުރުން ކޮލަމްބިއާގެ އެޓާނީ ޖެނެރަލް ފްރާންސިސްކޯ ބަރްބޯސާ ހާމަކޮށްފައިވާ ގޮތުން، އޭނާ ވާނީ ދެފަހަރެއްގެ މަތިން ލުއިސް ޑިއާޒްއާ ގުޅާ، އޮޕަރޭޝަންގެ އަދާހަމަ މައުލުމާތު އޭނާއާ ހިއްސާކޮށްފައެވެ.

ކޮލަމްބިއާއަކީ މިފަދަ ކުށްތަކަށް މަޝްހޫރު ގައުމަކަށް ވިޔަސް، 2000 ވަނަ އަހަރުން ފެށިގެން ކިޑްނެޕް ކުރުމުގެ މައްސަލަތައް ރިޕޯޓް ކުރެވިފައިވާ މިންވަރު ވަނީ ދަށްވެފައެވެ. އެގޮތުން މި ފަހުގެ ނަމްބަރުތައް ބުނާގޮތުން، އެ އަދަދު ހާހަކަށް ވެސް އަރާފައެއް ނުވެއެވެ. ނަމަވެސް މި އަހަރު އަނެއްކާވެސް މިފަދަ ކޭސްތައް ރިޕޯޓް ކުރާ މިންވަރު އަންނަނީ އިތުރުވަމުންނެވެ. އެގޮތުން ފުރަތަމަ 6 މަހު މި އަދަދު 77 ގައި ހުރި ނަމަވެސް، ޖުލައި މަހުގެ ފަހުން އެދަދު ދެގުނަވެ، މިހާތަނަށް ރިޕޯޓު ކުރެވުނު ކޭސްތަކުގެ އަދަދު ވަނީ 160 ން މައްޗަށް އަރާފައެވެ. އަދި އެގައުމުގެ ޑިފެންސް މިނިސްޓްރީއިން ހާމަކުރާގޮތުން، ގޭންގުތަކުން މިކަން ކުރަނީ ފައިސާ ހޯދުމަށެވެ.