އިސްރާއީލާއި، ޖަރުމަނުގެ ރައްޔިތުކަން އޮންނަ، ޝާނީ ލޫކްގެ މަރުވެފައިވާ ހަށިގަނޑު ދެނެގަނެވިފައިވާކަމުގައި އިޒްރޭލުގެ ފޮރިން މިނިސްޓްރީން ބުނެފިއެވެ.

އެހެންނަަމަވެސް ޝާނީގެ މަރުވެފައިވާ ހަށިގަނޑު ފެނުނީ ކޮންތާކުން ކަމެއް ކޮންއިރަކު ކަމެއް އިޒްރޭލުން އަދި ހާމައެއް ނުކުރެއެވެ.

ޔަހޫދީންގެ ކައްފާރާ ދުވަހާއި ދިމާކޮށް، ހިފާފައިވާ ފަލަސްޠީނުގެ ބިމުގައި އިޒްްރާއީލުން ބޭއްވި ނޯވާ މިޔުޒިކް ފެސްޓިވަލްގެ ތެރެއިން ހަމާސްއިން އަސީރުންގެ ގޮތުގައި ޣައްޒާއަށް ގެންދިޔަ މީހުންގެ ތެރޭގައި، ޝާނީ ހިމެނޭކަމަށް އިޒްރޭލުން ކުރިން ބުނެފައިއެވެ. އަދި އޮރިޔާން ހާލުގައި ޕިކަޕަކަށްލައިގެން ގެންދަނިކޮށް ފެނުނީ، ޝާނީގެ ހަށިގަނޑުކަމަށްވެސް ހަމަލާގެ ކުރީކޮޅު އިޒްރޭލުން ބުނެފައިވެއެވެ. އެހެން ނަމަވެސް ޝާނީ ލޫކް މަރު ނުވާކަމަށާއި އޭނާއަށް ޣައްޒާ ހޮސްޕިޓަލްގައި ފަރުވާދެމުންދާކަމުގައި، ޝާނީގެ މަންމަ މީޑިއާގައި ހާމަކުރުމަށްފަހު އޭގެ ފަހުން އެކަމާއި ގުޅޭ ގޮތުން އާއިލާއިންވެސް އެއްވެސް ވާހަކައެއް ދައްކާފައެއް ނުވެއެވެ.

ޝާނީ ލޫކްގެ މަރުވެފައިވާ ހަށިގަނޑު ހަމަލާއަށް 23 ދުވަސް ފަހުން ފެނިއްޖެކަމުގައި އިޒްރޭލުން ހާމަކުރި އިރު، ނޯވާ ފެސްޓިވަލުގެ ތެރެއިންނާއި، އިޒްރާއީލުން ހިފާފައިވާ ބިންތަކުގައި ހަދާފައިވާ ޔަހޫދީ އާބާދީތަކުން އެތައް ބަޔަކު މަރުވެގެން ދިޔައީ އިޒްރާއީލު ސިފައިން ހަމާސްގެ މުޖާހިދުންނާއި ދެކޮޅަށް ދިން ވަރުގަދަ ރައްދު ހަމަލާތަކުގެ ސަބަބުންކަމުގައި މިހާރު ވަނީ ހާމަވާން ފަށާފައެވެ.