ދިވެހިރާއްޖޭގެ ޤައުމީ އެއާލައިން މޯލްޑިވިއަންއިން އިންޑިއާގެ ބެންގަލޫރަށް މިއަދު އަލުން ދަތުރުތައް ފަށައިފިއެވެ.

މޯލްޑިވިއަންއިން ބުނީ، ވެލާނާ އިންޓަނޭޝަނަލް އެއާޕޯޓުން ބެންގަލޫރު އެެއާޕޯޓަށް ކުރާ ދަތުރުތައް ހަފްތާގެ ދެދުވަހުގައި އޮންނާނެ ކަމަށެވެ. މިގޮތުން ދަތުރުތައް އޮންނާނީ، ހޯމަ ދުވަހާއި ބުދަ ދުވަހުގައި ކަމަށާއި، މޯލްޑިވިއަންގެ ވެބްސައިޓާއި އެޕްމެދުވެރިކޮށް މިހާރު ޓިކެޓް ބުކްކުރެވޭނެ ކަމުގައިވެސް އެ އެއަރލައިނުން ވަނީ ބުނެފައެވެ.

މޯލްޑިވިއަންއިން ބުނީ، ދަތުރުތައް ހަމަޖެއްސުމުގައި، ބޭސްފަރުވާއާ ޗުއްޓީއަށް އަދި ވިޔަފާރީގެ ބޭނުންތަކަށް ބެންގަލޫރަށް ދަތުރުކުރާ ފަރާތްތަކަށް ފަސޭހަވާނޭ ހެން ޝެޑިއުލްހަމަޖައްސާފައި ވާނެ ކަމަށެވެ.

އިންޑިއާގެ ބެންގަލޫރަށް މިއަދު މޯލްޑިވިއަންގެ ދަތުރުތައް ފެށި އިރު އެ އެއާލައިނުން މިހާރުވެސް އިންޑިއާގެ ޗެންނާއިއަށާއި ޓްރެވިންޑްރަމްއަށް ޝެޑިއުލްދަތުރުތައް ކުރެއެވެ.