ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާން އަރިއަތޮޅުގައި މަސައްކަތްކުރާ ޝަރުޢީދާއިގެ މުވައްޒަފުންނާއި ބައްދަލުކުރައްވައިފިއެވެ.

މިހަފްތާގެ ކުރީކޮޅު އެމަނިކުފާނު އަރިއަތޮޅަށް ކުރެއްވި ދަތުރުފުުޅުގައި ވަނީ، އއ. ތޮއްޑޫ، އުކުޅަސް، ރަސްދޫ، ހިމަންދޫ، ފެރިދޫ އަދި މަތިވެރިއަށް ވަޑައިގެން، އެރަށްރަށުގެ މެޖިސްޓްރޭޓް ކޯޓުތަކުގައި މަސައްކަތްކުރައްވާ، މެޖިސްޓްރޭޓުންނާއި، މުވައްޒަފުންނާއި ބައްދަލުކުރައްވާފައި ކަމުގައި، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ހާމަކުރައްވާފައިވެއެވެ. މިދަތުރުފުޅުގައި އުއްތަމަ ފަނޑިޔާރު ވަނީ، މެޖިސްޓްރޭޓް ކޯޓުތަކަށް ޒިޔާރަތް ކުރައްވައި، އެކޯޓުތަކަށް ޒިޔާރަތްކުރާ އިއްޒަތްތެރިންގެ ދަފުތަރުގައި ސޮއެކުރައްވާފައެވެ.

މީގެ އިތުރުން، އއ. ހިމަންދޫ މެޖިސްޓްރޭޓް ކޯޓުގެ އިމާރާތްވެސް އެމަނިކުފާނު ވަނީ، ހޮނިހިރު ދުވަހު ހުޅުއްވައިދެއްވާފައެވެ.

އއ. އަތޮޅުގައި ޝަރުޢީދާއިރާގައި މަސައްކަތް ކުރާ ފަރާތްތަކާއި އެކު ބޭއްވި މިބައްދަލުކުރެއްވުމުގައި، އުއްތަމަ ފަނޑިޔާރު ވަނީ މެޖިސްޓްރޭޓް ކޯޓުގެ މަސައްކަތްތައް ކުރިޔަށް ގެންދިޔުމުގައި ހުރި ދަތިތަކާއި، އަދި މުވައްޒަފުންގެ ހުރި ކަންބޮޑުވުންތައް އަޑުއައްސަވައި، ޝަރުޢީ ދާއިރާ ހަރުދަނާކުރުމުގެ ގޮތުން ކުރެވެމުންދާ މަސައްކަތްތަކުގެ މައުލޫމާތު ދެއްވާފައެވެ.