ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ މައްޗަށް އެމްޑީޕީން ހުށައަޅާފައިވާ އިތުބާރު ނެތްކަމުގެ މައްސަލަ ކުރިޔަށް ގެންދިޔުމަށް މިއަދު ނިންމާފައި ވީ ނަމަވެސް ރައްޔިތުންގެ މަޖިލީހުގެ ނައިބު ރައީސާ އީވާ ޢަބުދުﷲ މަޖިލީހަށް ސަލާމް ފޮނުވުމާއި ގުޅިގެން ޖަލްސާ ނުބޭއްވި ކެންސަލް ވެއްޖެއެވެ.

ރައްޔިތުންގެ މަޖިލީހުގެ އަމީންޢާއްމު ފާޠިމަތު ނިއުޝާ ވަނީ، މަޖިލީހުގެ ޖަލްސާ އީވާ ސަލާމްގައި ހުންނެވުމުގެ ސަބަބުން ކެންސަލްވެފައިވާ ކަން އިޢުލާން ކުރައްވާފައެވެ. އަދި މާދަމާގެ ޖަލްސާގެ ރިޔާސަތަށް ވަޑައިގެން ދެއްވުމަށްވެސް އީވާއަށް ދަންނަވާނެކަމުގައި ނިއުޝާ ވިދާޅުވިއެވެ.

އެމްޑީޕީގެ މެމްބަރުން ތުހުމަތު ކުރައްވާފައިވާ ގޮތުގައި އީވާ މަޖިލީހަށް ސަލާމް ފޮނުއްވާފައި ވަނީ މަޖިލީހުގެ ރައީސް އަދި އެކަމަނާގެ ބޮޑުބޭބޭފުޅު ރައީސް ނަޝީދު މަޤާމުން ވަކި ކުރުމުގެ މައްސަލައަށް ހުރަސް އެޅުމުގެ ގޮތުން ކަމަށެވެ. ޖަލްސާ ނުބޭއްވޭނެ މަޖިލީހުގެ ތަޅުމުގައި އިއުލާނު ކުރައްވަމުން ނިއުޝާ ވިދާޅުވީ، އީވާ މަޖިލީހުގެ އިދާރާއަށް ސަލާމް ފޮނުއްވާފައި ވަނީ މިއަދު ހެނދުނު ކަމަށެވެ.

ރައީސް ނަޝީދުގެ އިތުބާރު ނެތްކަމުގެ މައްސަލަ ކުރިޔަށް ގެންދިޔަ ނުދިނުމަށް ރައީސް ނަޝީދުގެ ފަރާތްޕުޅުން މަސައްކަތް ކުރަމުންދާއިރު މީގެ ކުރިން ހުށައެޅި އިތުބާރު ނެތްކަމުގެ މައްސަލަ ރައީސް ނަޝީދު ކުރިޔަށް ދިޔަނުދީ ހިފެހެއްޓެވީ، މަޖިލީހުގެ ދާއިމީ ކޮމިޓީތައް އެކުލަވާލުން ފަސްކުރައްވައިގެންނެވެ. ރައީސް ނަޝީދަށް އެމްޑީޕީގެ އެތެރޭގެ ބާރުވެރިކަން ގެއްލުމާއި، ރިޔާސީ ޕްރައިމަރީގައި ލިބުނު ނާކާމިޔާބީއާ ގުޅިގެން ކޯފާވެ ވަޑައިގެން ރައީސް ނަޝީދު ގެންދަވަނީ އެމްޑީޕީ ރޫޅާލެއްވުމަށް މަސައްކަތްކުރައްވަމުންނެވެ. އެހެންވެ އެމްޑީޕީގެ މެމްބަރުން ރައީސް ނަޝީދު ސިފަކޮށްފައި ވަނީ އިންޑިއާކަނޑުގެ މުގާބޭގެ ގޮތުގައެވެ.

ރައީސް ނަޝީދުގެ ވަކިކުރުމުގެ ޖަލްސާ ކުރިޔަށް ގެންދިޔުމަށް ރައީސް ނަޝީދު ހުއްޓުވާނަމަ ކޯޓު މެދުވެރިކޮށްވެސް އެޖަލްސާ ބާއްވާނެ ކަމުގައި އެމްޑިޕީން ދަނީ ބުނަމުންނެވެ.