ގދ. ތިނަދޫ ފެން ހިންދާ ނިޒާމުގެ މަސައްކަތް ނިންމާ ޓެސްޓުކޮށްފިއެވެ.

މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން ވިދާޅުވީ ތިނަދޫ ފެން ހިންދާ ނިޒާމުގެ މަސައްކަތް ނިންމާ ޓެސްޓު ކުރުމާއި ކޮމިޝަން ކުރުމުގެ މަސައްކަތް ކުރިއަށް ގެންގޮސްފައިވަނީ މި މެއި މަހު 12 އިން 13 އަށް ކަމަށެވެ، މިމަސައްކަތް އެމިނިސްޓްރީން ހަވާލުކުރައްވާފައި ވަނީ، ސެނޮކް ޕްރައިވެޓް ލިމިޓެޑާއެވެ.

‎ގދ. ތިނަދޫގައި ފެން ހިންދާ ނިޒާމް ޤާއިމްކުރުމުގެ ޢަމަލީ މަސައްކަތް ކުރިޔަށް ގެންގޮސްފައިވަނީ މިނިސްޓްރީ އޮފް އެންވަޔަރަންމަންޓިން، ސެނޮކް ޓްރޭޑް ކޮމްބައިން (ޕްރައިވެޓް) ލިމިޓެޑްއާ ހަވާލުކުރައްވައިގެންނެވެ. މިމަޝްރޫޢުގެ އެއްބަސްވުމުގައި ސޮއެކޮށްފައި ވަނީ 2019 އޮކްޓޫބަރު މަހުގެ 13ވަނަ ދުވަހުގައެވެ. ސަރުކާރުގެ ބަޖެޓުން ޚަރަދުކުރައްވައިގެން ކުރިޔަށް ގެންދިޔަ މިމަޝްރޫޢުގެ އަގަކީ، 16.8 މިލިޔަން ރުފިޔާއެވެ.

އެއް އަހަރުގެ ތެރޭގައި މަސައްކަތް ނިންމާގޮތަށް ހަވާލުކުރި މިމަޝްރޫޢުގެ މަސައްކަތް ދިގުލައިގެންދިޔައީ، ކޯވިޑް-19ގެ ބަލި މަޑުކަމާއި އަދި މަޝްރޫޢުގެ ޑިޒައިނަށް ގެންނަން ޖެހުނު ބަދަލުތަކުގެ ސަބަބުން ކަމުގައި އެންވަޔަރަންމަންޓް މިނިސްޓްރީން ވަނީ ވިދާޅުވެފައެވެ.

އެމިނިސްޓްރީން ވިދާޅުވީ، މި މަޝްރޫޢުގެ ސަބަބުން ގދ. ތިނަދޫގެ ރައްޔިތުންނަށް ފާއިތުވި އަހަރުތަކުގެ ތެރޭގައި ބޯކޮށް ވާރޭވެހި ރަށުގައި ފެންބޮޑުވާ މައްސަލައަށް ދާއިމީ ހައްލެއް ލިބިގެންދާނެ ކަމަށް ސަރުކާރަށް ޤަބޫލުކުރެއްވޭ ކަމަށެވެ.