ހޮނިހިރު ދުވަހުގެރޭ ބާސެލޯނާގެ ދަނޑުގައި ކުޅުނު މި ސީޒަނުގެ ފުރަތަމަ އެލްކްލެސިކޯ މެޗުގައި ބާސެލޯނާއިން ގޯލެއް ޖަހާފައިވަނިކޮށް، ފަހަތުން އަރާ 2 ގޯލު ޖެހުމަށްފަހު ރެއާލް މެޑްރިޑްއިން މެޗު ކާމިޔާބުކޮށް، ލީގުގެ 1 ވަނައަށް އަނބުރާ ޖެހިލައިފިއެވެ. މި މެޗުގެ ހީރޯއަކީ މި ސީޒަނުގައި މެޑްރިޑަށް ބަދަލުވެ، ފުރަތަމަ އެލްސިކޯ ފެނިލުމުން 2 ގޯލު ކާމިޔާބުކޮށް މެޗުގެ ނަތީޖާ އަނބުރާލި ޖޫޑް ބެލިންގްހަމްއެވެ.

މެޗުގެ ކުރީކޮޅު ލީޑު ނެގީ ބާސެލޯނާއިންނެވެ. އެއީ މެޗުގެ 6 ވަނަ މިނެޓުގައި އެ ޓީމުގެ މިޑްފީލްޑަށް ކުޅޭ އިކްލޭ ގުންޑޮގަން ކާމިޔާބުކޮށްދިން ޕެނަލްޓީއަކުންނެވެ. އަދި ފުރަތަމަ ހާފު ނުރައްކާތެރި ގިނަ ހަމަލާތަކެއް އުފެއްދިތަން ވެސް ފެނުނީ ބާސެލޯނާއިންނެވެ.

ބާސެލޯނާގެ ގޯލު މެޑްރިޑަށް ފޫއަޅުވާލެވުނީ މެޗުގައި ގަޑިއިރަކަށް ވުރެ ގިނަ ވަގުތު ކުޅެވުންފަހުން، 68 ވަނަ މިނެޓުގައި ބެލިންގްހަމް ކާމިޔާބުކުރި މޮޅު ގޯލަކުންނެވެ. މިއީ ބާސެލޯނާގެ ގޯލާ 30 ޔާޑު ދުރުގައި ހުރެފައި މަތީ ކަނަށް ފޮނުވާލައިގެން އޭނާ ކާމިޔާބުކުރި ގޯލެކެވެ.

މެޗުން މޮޅުވި ގޯލު، މެޗުން ނިމެންދަނިކޮށް، އިތުރު ވަގުތުގެ 2 ވަނަ މިނެޓުގައި ވެސް ކާމިޔާބު ކޮށްދީފައިވަނީ ބެލިންގްހަމްއެވެ. މި ގޯލާއެކު، އެންމެ 20 އަހަރުގެ ބެލިންގްހަމް މިވަނީ މިސީޒަނުގައި ކްލަބަށާއި ގައުމީޓީމަށް ކުޅުނު 16 މެޗުން 14 ގޯލު ކާމިޔާބުކޮށްފައެވެ. އަދި މެޑްރިޑްގެ ޖާޒީގައި އެ ކްލަބަށް ކުޅުނު ކޮންމެ މެޗަކަށް ގޯލެއް މިވަނީ ހަމަކޮށްފައެވެ.

މެޑްރިޑަށް ބެލިންގްހަމް ގެނައީ މިދިޔަ ޓްރާންސްފާ ވިންޑޯގައި ޖަރުމަނުގެ ބޮރޫޝިއާ ޑޯޓްމަންޑްއަށް ޓްރާންސާ ފީގެ ގޮތުގައި 103 މިލިއަން ޔޫރޯ ދީގެންނެވެ. މެޑްރިޑުން ބެލިންގްހަމް ކާމިޔާބުކުރީ ލިވަޕޫލަށް އޭނާ ގެންދިއުމަށް އެ ޓީމުން ވެސް ފާރަލާން ތިއްބައެވެ.