ޤައުމީ ޓީމާއި ފުރަތަމަ ޑިވަޝަނުގެ ގިނަ ކުޅުންތެރިންތަކެއް ފެނިގެން ދިޔަ ރެޑް ވޭވް އޭދަފުށީ ފުޓުބޯޅަ މުބާރާތުގެ ފައިނަލް މެޗު ހުކުރު ދުވަހުގެ ހަވީރު ކުޅުނުއިރު، މި މުބާރާތުންވަނީ ތަފާތު ކަންތައްތަކެއް ފާހަގަ ކުރެވިފައެވެ. މިކަންތައްތަކުގެ ޙާއްސަކަމަކީ، މީގެ ތެރެއިން އެއްވެސްކަމަކީ އަދި މިހާތަނަށް މި ފެންވަރުގައި މާލެ ފިޔަވާ އެހެން ރަށަކުން ފެނިފައި ނުވުމެވެ.

އެގޮތުން ފުރަތަމަކަމަކީ، އޭދަފުށީގައި ބިނާކޮށްފައިވާ ރީތި ސްޓޭޑިއަމެވެ. މި ސްޓޭޑިއަމްގެ މަސައްކަތް މުޅިން ނިމިފައި ނުވިނަމަވެސް، އެ ސްޓޭޑިއަމްގެ ހިތްގައިމުކަން މިވަނީ ފެނިފައެވެ. އަދި މިއީ ފުޓުބޯޅައަށް ލޯބިކުރާ ފަރާތްތަކަށް ނުދައްކާ ދޫކޮށްލެވޭ ވަރަށް ވުރެ، ދައްކާ ހިތްވާ ވާހަކައަކަށް މިވަނީ ވެފައެވެ. އެގޮތުން ފުޓުބޯޅަ ކޮމެންޓޭޓަރ ހަފްސީ އަބްދުﷲ ވަނީ އެ ސްޓޭޑިއަމްގެ ފުރިހަމަކަން، އެ ތާންގައި ހުރެ ނެގި ވީޑިއޯތަކަކާއެކު ސޯޝަލް މީޑިއާގައި ހިއްސާކޮށްފައެވެ.

ހަފްސީ ސިފަކޮށްފައިވާ ގޮތުގައި އޭދަފުށީ ސްޓޭޑިއަމްއަކީ މިވަގުތު ރާއްޖޭގައި ހުރި ކުޅިވަރުގެ އެންމެ ވަރުގަދަ އިންފްރާސްޓްރަކްޗާރ ކަމަށާއި، އަދި އެއީ އެންމެ ރަގަޅު، އެންމެ ފުރިހަމަ އަދި އެންމެ ޒަމާނީ ސްޓޭޑިއަމްކަމަށެވެ. ހަފްސީ އިތުރަށް ފާހަގަކުރީ، ރާއްޖޭގެ ރަސްމީ ސްޓޭޑިއަމް ވެސް އޭދަފުށީ ސްޓޭޑިއަމްއާ އެއް ފެންވަރު ނޫން ކަމަށާއި، އޭދަފުށީ ސްޓޭޑިއަމް ހުރިހާ ގޮތަކުން ވެސް ގަލޮޅު ދަނޑަށް ވުރެ ފުރިހަމަކަމަށް ފާހަގަކޮށްފައިވެއެވެ.

އޭދަފުށީ ސްޓޭޑިއަމް އެއްކޮށް ނިންމާ އަދި ރަސްމީކޮށް ހުޅުވާފައެއް ނުވެއެވެ. ސްޓޭޑިއަމްގެ އެތެރެއަށް ނަޒަރު ހިންގާލާއިރު، ޗޭންޖިންގ ރޫމަކީ ރާއްޖެއިން މިހާތަނަށް ފެނިވައިވާ ފެންވަރުގެ ތަނަކަށް ވުރެ ހުރިހާ ގޮތަކުން ވެސް މާ ފުރިހަމަ ތަނެކެވެ. އެއީ ޔޫރަޕްގެ ބޮޑެތި ކްލަބްތަކުގެ ސްޓޭޑިއަމްގައި ހުންނަ ޗޭންޖިންގ ރޫމްތަކަށް ދޫކުރާ ފެންވަރުގެ ވެސް ތަނެއް ނޫނެވެ. މި ސްޓޭޑިއަމްގައި ފުރިހަމަކުރާނެ އިތުރު ވަސީލަތްތަކަށް ބަލާލާއިރު، ޖިމްއަކާއި، ފިޓްނަސް މަސާޖު ސެންޓަރެއް ހިމެނެއެވެ. މީގެ އިތުރުން ރެފްރީންނަށް ޙާއްސަ ރޫމަކާއި، ޕްރެސް ރޫމެއް ވެސް ހިމެނެއެވެ. އަދި ކުޅިބެލުންތެރިން ތިބުމަށް ތައްޔާރު ކޮށްފައިވާ ސިޑިބަރިވެސް ވަނީ ވަރަށް ފުރިހަމައަށް ތައްޔާރުކޮށްފައެވެ. އެގޮތުން، ކުޅިބެލުމަށް ވަޑައިގަންނަވާ ޙާއްސަ ބޭފުޅުންނަށް ވަކި ސަރަޙައްދަކާއި، ކޮމްނެޓޭޓަރުންނާއި މީޑިއާތަކުން ހަރަކާތްތެރިވުމަށް ވަކި ސަރަޙައްދެއް ގާއިމްކޮށްފައިވެއެވެ.

އޭދަފުށީ ސްޓޭޑީއަމްގައި ގާއިމްކޮށްފައިވާ ޗޭންޖިންގ ރޫމް، ފޮޓޯ: ސިޑިބަރި

އަދި މި ސްޓޭޑިއަމްގައި އަޅާފައިވާ ޓާފަކީ ފީފާއިން ގަބޫލުކުރާ ފެންވަރަށް ދުނިޔޭގައި ޓާފް އުފައްދާ ހަތް ކުންފުނީގެ ތެރޭގައި ހިމެނޭ ލިމޮންޓާ ސްޕޯޓްސް އެސް.ޕީ.އޭ އިން އުފައްދާފައިވާ އެސްޕީމެކްސް-45 ގެ ޓާފެއްކަމަށް އޭދަފުއްޓަށް ނިސްބަތްވާ ނޫހަކުން ރިޕޯޓުކޮށްފައިވެއެވެ. މީގެ އިތުރުން މިއީ ރާއްޖޭގައި ބިމުގެ ފަސް ހަރުކޮށްގެން އާންމުކޮށް އަޅާ ދަނޑުތަކާއި ތަފާތު ގޮތަކަށް އަޅާފައިވާ ދަނޑެކެވެ. އެގޮތުން ދަނޑުއަޅާ ބިން ފުނަށް ކޮނުމަށްފަހު އޭގެ މައްޗަށް 3000 ޓަނުގެ ފުނޑުކުރި ހިލަވެލިއަޅާ ބިން އެއްވަރުކޮށް، އޭގެ މަތީގައި ދަނޑުގެ އަޑިއަށް ފެން ނުދާނެހެން ވޯޓަރ ޕްރޫފް މެމްބްރޭންއެއް އަޅާފައިވެއެވެ. އަދި އޭގެ މަތީ ޝޮކްޑްރެއިން ނިޒާމު ގާއިމުކޮށްފައިވެއެވެ. މި ނިޒާމަކީ އާންމުކޮށް ބިމުގެ ފަސްހަރުކޮށްގެން އެޅޭ ދަނޑުތަކާއި ބަލާފައި ކުޅުންތެރިންނަށް ލިބޭ އަނިޔާ ކުޑަކޮށް ދޭނެ ނިޒާމެކެވެ.

އޭދަފުށީ ފުޓުބޯޅަ މުބާރާތް ނިމިގެން ދިޔައިރު ދެން ފާހަގަ ކުރެވުނު ކަމަކީ، ރާއްޖޭގެ ރަށެގައި މެޗު ބެލުމަށް ފުރަތަމަ ފަހަރަށް ޓިކެޓު ވިއްކައިގެން މުބާރާތެއް ބޭއްވުމެވެ. ރިޕޯޓުތައް ބުނާ ގޮތުން، ފައިނަލް މެޗަށް ވިއްކި 700 ޓިކެޓް އެއްކޮށް ހުސްވެ، ބްލެކް މާކެޓުގައި ވެސް ޓިކެޓުގެ މުއާމަލާތްތައް ކުރިއެވެ.

ދެން ފާހަގަ ކުރެވުނު އެންމެ މުހިންމު އަދި އެންމެ ޙާއްސަކަމަކީ، އޭދަފުށީ ދަރިއެއްގެ ހިތުގައި އެ ރަށަށާއި، އެ ރަށުގެ ޒުވާނުންގެ ކުރި އެރުމަށާއި، ރަށުގެ އިޖްތިމާއީ ކަންކަމަށް އޮތް ލޯތްބެވެ. އޭދަފުށީ ފުޓުބޯޅަ ސްޓޭޑިއަމަކީ އެ ރަށު ޗާންދަނީގޭ އަހްމަދު ނަޒީރު (ކްރައުން ނަޒީރު)ގެ ހަދިޔާއެކެވެ. މާލީ ގޮތުން ތަނަވެސް ކޮންމެ މަހުޖަނަކީ މިގޮތަށް އިޖްތިމާއީ ކަންކަމަށް ފައިސާ ހަރަދު ކުރާނެ މީހެއް ނޫނެވެ. ނަމަވެސް ނަޒީރުގެ މި ދީލަތިއެހީއަކީ ޒަމާންތަކަކަށް ދެމިގެން ދާނެ އެހީއެކެވެ. މީގެ ފައިދާ ކުރާނީ ހަމައެކަނި އޭދަފުށީ ޒުވާނުންނަށް، ނޫނީ އެ ރަށު ފުޓުބޯޅައަށް އެކަންޏެއް ނޫނެވެ. މީގެ ފައިދާ މުޅި ރާއްޖެއަށް ކުރާނެކަން ޔަގީނެވެ.