ވިނަރެސް ފްލެޓްތައް ގަންނަން ބޭނުންވާ ފަރާތްތަކަށް އިތުރު ފުރުޞަތެއް ދިނުމަށް ނިންމާފައިވާ ކަމުގައި އާބަންކޯއިން ހާމަކޮށްފިއެވެ.

އެކުންފުނިން ބުނީ، ވިނަރެސްގެ ބާކީ ހުރި ފުލެޓުތައް ގަތުމަށް ބޭނުންވާ ފަރާތްތަކަށް އަންނަ ނޮވެމްބަރު މަހުގެ 5 ވަނަ ދުވަހު އެކަމަށް އެދި ހުށައެޅުމުގެ ފުރުޞަތު ހުޅުވާލުމަށް ނިންމާފައިވާ ކަމަށެވެ. މިގޮތުން އެކި ސަބަބު ތަކާއި ހެދި މިހާރު ނުވިކި ހުރި ހުރިހާ ފްލެޓްތަކެއް ވިއްކައި ނިމެންދެން ފްލެޓްގަތުމަށް ބޭނުންވާ ފަރާތްތަަކަށް އެފުރުޞަތު ދޭނޭ ކަމުގައިވެސް އެކުންފުނިން ވަނީ ބުނެފައެވެ. 

ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ)އާ ހަވާލުކޮށްގެން ކުރިއަށް ގެންދިޔަ ވިނަރެސް މަޝްރޫއުގެ ދަށުން ތިން ކޮޓަރީގެ 1344 އެޕާޓްމަންޓް ހަދާފައިވެއެވެ. އަދި މިހާތަނަށް ވިކިފައި ވަނީ އޭގެ ތެރެއިން، 288 ފްލެޓެވެ.

ވިނަރެސް ފްލެޓްތައް ވިއްކުމަށް ކުރިން ހުޅުވާލި ފުރުޞަތުގައި، 1413 ފަރާތަކުން އެކަމަށް އެދި ހުށައެޅިއެވެ. އެހެން ނަމަވެސް ގިނަ ފަރާތްތަކަކަށް އެތަންތަން ގަނެވޭ ގޮތް ނުވީ، ފްލެޓްތައް ވިއްކާ އަގު ބޮޑުވުމާއި، ޑައުންޕޭމެންޓަށް ދައްކަންޖެހޭ އަގު ބޮޑުވުމާއި، މަހުން މަހަށް ދައްކަންޖެހޭ ކުލި ބޮޑުވުމުގެ ސަބަބުންނެވެ.

އާބަންކޯއިން މިހަފްތާގައި ވަނީ، ވިނަރެސް މަޝްރޫޢުގެ ދަށުން ވިއްކާ ފްލެޓްތަކުގެ އިންޓަރެސްޓްގެ ގޮތުގައި ދައްކަންޖެހޭ އަދަދުވެސް %9 އިން %6އަށް ކުޑަކޮށްފައެވެ. އެއާއިއެކު 25 އަހަރަށް ބަހާލައިގެން ފައިސާ ދައްކާ ޚަލާސްކުރާނަމަވެސް މިލިޔަނެއްހައި ރުފިޔާ ކުޑަވެގެންދެއެވެ. 

ވިނަރެސް ފްލެޓްތައް ވިއްކަނީ، 2.5 މިލިޔަނާއި 3 މިލިޔަނާއި ދެމެދުގެ އަގުތަކެއްގައެވެ.