Advertisement
ރައީސުލްޖުމްހޫރިއްޔާގެ ނައިބު ފައިޞަލް ނަސީމް --
ކަޅައިދޫގައި ހިންގުމަށް ރާވާފައިވާ މަޝްރޫޢު ހުއްޓާނުލައި ކުރިޔަށް ގެންދެވުމަށް ނައިބު ރައީސް އެދިވަޑައިގެންފި
މަސްތުވާތަކެތީގެ މައްސަލައަށް ވަށައިޖެހޭ ހައްލެއް ހޯދުމަށްޓަކައި، ރިހެބިލިޓޭޝަން އައިލެންޑް މޮޑެލެއްގެ ގޮތުގައި ހައްދުންމަތީ ކަޅައިދޫ ތަރައްޤީކުރުމަށް ކުރެވެމުން ދިޔަ މަސައްކަތްތައް ހުއްޓާނުލައްވައި ކުރިޔަށް ގެންދެވުމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް އެދިވަޑައިގެންފިއެވެ.
އެމަނިކުފާނު މިކަމަށް އެދިވަޑައިގެންނެވީ، މާލޭ އޭރިޔާގެ ކުރީ ސަފުގައި މަސައްކަތްކުރާ ފުލުހުންނާއިއެކު ބޭއްވި ބައްދަލުކުރެއްވުމުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި ވިދާޅުވީ، ރައްޔިތުންގެ އެންމެ ބޮދު ކަންބޮޑުވުމެއްގެ ގޮތުގައި އޮތް އެއްމައްސަަލައަކީ މަސްތުވާތަކެތީގެ މައްސަލަ ކަމަށެވެ. އެއީ ވަރަށް ގިނަ ޒަމާންތަކެއް ވެގެން ގޮސްފައިވާ ބޮޑު މައްސަލައެއް ކަމަށާއި އެމައްސަލައަށް ހައްލު ހޯދުމަށް މިސަރުކާރުންވެސް ވަރަށް ގިނަ މަސައަކްތަތަކެއް ކުރައްވާފައިވާ ކަން ރައީސުލްޖުމްހޫރިއްޔާގެ ނައިބު އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވީ މަސްތުވާތަކެތީގެ މައްސަލައާ ދެކޮޅަށް ގިނަ މަސައްކަތްތަކެއް ކުރެވުނު ނަމަވެސް އެންމެ ބޭނުންވާ ވަރަށް އަދިވެސް ހުރީ މަސައްކަތްތައް ނުކުރެވިކަމަށެވެ. އެގޮތަށް އެމަނިކުފާނު ފާހަގަކުރައްވާ ސަބަބެެއްގެ ގޮތުގައި ވިދާޅުވީ، މަސްތުވާތަކެތީގެ މައްސަލައަކީ ވަރަށް ބޮޑު މައްސަލައަކަށްވެފައި އެކަމަށް އެކަށީގެންވާ ހައްލެއް ހޯދޭނީ، ހުރިހާ އެންމެންގެ ޝާމިލްވުން އޭގައި ހިމެނިގެން ކަމަށް ވާތީއެވެ. އަދި ދުވަހުން ދުވަހަށް ކޮށްލެވޭ ކަމަކުން މަސްތުވާތަކެތީގެ މައްސަލައަށް ހައްލެއް ނުހޯދޭނެ ކަމަށާއި، މަސްތުވާތަކެތީގެ މައްސަލަ ހައްލުކުރުމުގެ އަމާޒަށް ވާޞިލްވުމަށްޓަކައި ކުރިޔަށް ކުރަން ހުރި ކަންތައްތައް އަދި މާގިނަ ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ.
މި ފަސްއަހަރުގެ ތެރޭގައި މަސްތުވާތަކެތީގެ މައްސަލަ ހައްލު ކުރުމަށް ކުރެވުނު މަސައްކަތް ތަކުގެ ދަށުން، ވަށައިޖެހޭ މޮޑެލްއެއްގެ ގޮތުގައި މަސްތުވާތަކެތީގެ މައްސަލައަށް ހައްލު ހޯދުމަށް، ހައްދުންމަތީ ކަޅައިދޫ ރިހެބިލިޓޭޝަން އައިލެންޑެއްގެ ގޮތުގައި ތަރައްޤީކުރުމަށް ކުރެވެމުން އައި މަސައްކަތް މިދައުރުގެ ތެރޭގައި ނިންމާނުލެވި އޮތުމަކީ ހިތާމަފުޅު ކުރައްވާ ކަމެއް ކަމުގައި ނައިބު ރައީސް ވިދާޅުވިއެވެ. އެމަނިކުފާނު ފުލުހުންގެ ކިބައިން އެދިވަޑައިގެންނެވީ އައު ސަރުކާރާއި ގުޅިގެން އެކަންވެސް ކުރިޔަށް ގެންގޮސް ދެއްވުމަށެވެ.
މީގެ އިތުރުން، ރައްޔިތުންގެ ސަލާމަތާއި ރައްކާތެރިކަމަށް މިދައުރުގެ ތެރޭގައި ފެށި ހިނގަމުންދާ ކަންކަންވެސް އިތުރަށް ފުރިހަމަކޮށް އައު ސަރުކާރާއި އެކުގައި ކުރިޔަށް ގެންގޮސް ދެއްވުމަށް ރައީސުލްޖުމްހޫރިއްޔާގެ ނައިބު ވަނީ އެދިވަޑައިގެންފައެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ، ރައްޔިތުންގެ ސަލާމަތާއި ރައްކާތެރިކަމަށްޓަކައި އަދި ހޭލުންތެރިކަން އިތުރު ކުރުމަށާއި، އަމާން މުޖުތަމަޢެއް ޤާއިމް ކުރުމަށް ފުލުހުންނާއިއެކު ކުރެވުނު މަސައްކަތްތައް ފާހަގަކުރައްވައި ދިވެހި ފުލުހުންގެ ޚިދުމަތަށް ޝުކުރު އަދާކުރައްވާފައެވެ.
