ރާއްޖޭގެ އިޤުތިޞާދީ ސަރަޙައްދަށް ހުއްދަނެތި ވަދެ، މަސްވެރިކަން ކުރަމުން ދިޔަކަމުގެ ތުހުމަތުގައި 18 ސެޕްޓެންބަރު ގައި ކޯސްޓް ގާޑުން ހިފެހެއްޓި ސްރީލަންކާގެ 5 މަސްބޯޓުގެ މައްސަލަބަލައި، އެއުޅަނދުތައް ދޫކޮށްލާފައިވާ ކަމުގައި މިނިސްޓްރީއޮފް ފިޝަރީޒް، މެރިން ރިސޯަސަސް އެންޑް އެގްރިކަލްޗަރުން ހާމަކޮށްފިއެވެ.

އެމިނިސްޓްރީން ވިދާޅުވީ، ޤަވާއިދާ ޚިލާފަށް ރާއްޖޭގެ ސަރަހައްދަށް ވަދެ އުޅުނު އެ ބޯޓުތައް ދޫކޮށްލާފައި ވަނީ އެއުޅަނދުތަކަށް ކުރެވުނު ޖޫރިމަނާ ދެއްކުމުން، ކަމަށާއި އެބޯޓުތައް މިހާރު އަނބުރާ ސްރީލަންކާއަށް ފޮނުވާލާފައި ވާކަމަށެވެ.

އަދި މިފަދަ މައްސަލަތަށް ބެލުމުގައި، މޯލްޑިވްސް ނެޝެނަލް ޑިފެންސް ފޯސް، ދިވެހި ފުލުހުންގެ ޙިދުމަތް، މޯލްޑިވްސް އިމިގްރޭޝަން އަދި މޯލްޑިވްސް ކަސްޓަމްސް ސާރވިސްއިން ދެއްވާ އެއްބާރުލުން ފާހަގަކޮށް އެމިނިސްޓްރީން ވަނީ އެފަރާތްތަކަށް ޝުކުރު އަދާކޮށްފައެވެ.

އެމިނިސްޓްރީން ބުނީ، މަސްވެރިކަމުގެ އައު ޤާނޫނު 2019 ގައި ފާސްކުރެވުމަށްފަހު، ރާއްޖޭގެ ޚާއްޞަ އިޤުތިޞާދީ ސަރަޙައްދަށްވަދެ ޤާނޫނާ ޚިލާފަށް މަސްވެރިކަންކޮށްފައިވާ ބޭރުގެ 20 މަސްބޯޓެއްގެ މައްސަލަބަލައި، މިނިސްޓްރީއިންވަނީ އެ އުޅަނދުތައް ޖޫރިމަނާ ކޮށްފައި ކަމަށެވެ.

ރާއްޖޭގެ ސަރަހައްދުން އާއްމުގޮތެއްގައި ޤަވާއިދާ ޚިލާފަށް ވަދެ މަސްވެރިކަން ކުރަނިކޮށް އަތުލައިގަނެވޭ ބޯޓު ފަހަރުގެ ތެރޭގައި ހިމެނެނީ، އިންޑިއާ އާ ސްރީލަންކާއަށް ނިސްބަތްވާ ބޯޓުތަކެވެ.