ބުދަ ދުވަހުގެރޭ ކުޅުނު ޔޫއެފާ ޗެމްޕިއަންސް ލީގުގެ ގްރޫޕް ސްޓޭޖްގެ ތިން ވަނަ މެޗުގައި، ޖަރުމަންގެ ބޮރޫޝިއާ ޑޯޓްމަންޑް އަތުން އިނގިރޭސި ކްލަބް ނިއުކާސްލް ޔުނައިޓެޑް ބަލިވެއްޖެއެވެ. ނިއުކާސްލްގެ ސޓ. ޖޭމްސް ޕާކްގައި ކުޅުނު މި މެޗު ޑޯޓްމަންޑް ކާމިޔާބުކުރީ 1-0 އިންނެވެ. މިއީ، 20 އަހަރަށްފަހު ޗެމްޕިއަންސް ލީގަށް ކޮލިފައިވި ނިއުކާސްލްއަށް މި ސީޒަންގައި ކުރިމަތިލާން ޖެހުނު ފުރަތަމަ ބައްޔެވެ.

ޑޯޓްމަންޑްއާ ދެކޮޅަށް ނިކުތް އިރު، ނިއުކާސްލް ވަނީ ފުރަތަމަ ދެ މެޗުން 4 ޕޮއިންޓް ހޯދާފައެވެ. އެއީ ފުރަތަމަ މެޗުގައި އޭސީ މިލާންއާ ދެކޮޅަށް ކުޅުނު މެޗު 0-0 އިން އެއްވަރުވެ ލިބުނު 1 ޕޮއިންޓާއި، ދެ ވަނަ މެޗުގައި ގިނަ ބަޔަކު ހައިރާންކޮށްލުމަށްފަހު ޕީއެސްޖީ 4-1 ބަލިކޮށް ހޯދި 3 ޕޮއިންޓެވެ.  

ޑޯޓްމަންޑްގެ މޮޅާއެކު، އެ ޓީމު މިވަނީ ގްރޫޕްގެ ދެވަމައަށް ޖެހިލާފައެވެ. ގްރޫޕްގެ އެއް ވަނައިގައި 6 ޕޮއިންޓާއެކު އޮތީ ޕީއެސްޖީއެވެ. ގްރޫޕް ސްޓޭޖްގައި ކޮންމެ ޓީމަކަށް ވެސް ބާކީ 3 މެޗު އޮތްއިރު، ހުރިހާ ޓީމަކަށްވެސް ކުރިޔަށް ދިއުމުގެ ފުރުސަތު އެބައޮތެވެ.

ގްރޫޕް-ޖީ އަށް ބަލާލާއިރު، ބުދަ ދުވަހުގެރޭ މެންޗެސްޓަރ ސިޓީއިން ވަނީ ޔަންގް ބޯއީސް 3-1 އިން ބަލިކޮށްފައެވެ. އަދި ރ.ބ. ލެޕްޒިގް އިން ރެޑް ސްޓަރ ވެސް ހަމަ އެ ސްކޯއިން ބަލިކޮށްފައިވާއިރު، އެ ދެޓީމު ވެސް އޮތީ ރައުންޑް-އޮފް-ސިކްސްޓީންގެ ފުރުސަތު ވަރަށް ފުޅާކޮށްފައެވެ.