Advertisement
ސަރަނގު އާދަމް މަނިކާއިއެކު ރައީސް ޞާލިޙާއި އެކު ތިއްބެވި އެމްޑީޕީގެ އިސްބައެއް ބޭފުޅުން ---
ސަރަނގު އާދަމް މަނިކުވެސް ރައީސް ނަޝީދު ދޫކޮށްލައްވައި ރައީސް ޞާލިހްގެ ފަހަތްޕުޅަށް
އެމްޑީޕީގެ ރިޔާސީ ޕްރައިމަރީގައި ރައީސް ނަޝިދަށް ތާޢީދުކުރެއްވި އެމްޑީޕީގެ އިސް ބޭފުޅެއްކަމުގައިވާ އަދި މާލޭ ސިޓީ ކައުންސިލްގެ ކުރީގެ މޭޔަރު ސަރަނގު އާދަމް މަނިކު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށް ތާއީދުކުރައްވާކަން އޭނާ ހާމަކުރައްވައިފިއެވެ.
ރައީސް ސޯލިޙަށް ތާއީދު ކުރައްވާ ފަރާތްތަކުން ވަނީ މިކަން ހާމަކޮށް، ސަރަނގު އާދަމް މަނިކާއިއެކު އެމްޑީޕީގެ ޕާލަމެންޓްރީ ގްރޫޕުގައި ރައީސް ޞާލިހަށް ތާއީދުކުރައްވައިގެން ތިއްބެވި ބައެއް ބޭފުޅުންނާއި އެކު މެންދުރުގެ ކެއުމަކަށް އިންސާފުކުރާ މަންޒަރު ފެންނަ ފޮޓޯއެއްވެސް ސޯޝަލް މީޑިއާގައި އާއްމުކޮށްފައެވެ.
ޖެނުއަރީ މަހު އޮތް އެމްޑީޕީގެ ރިޔާސީ ޕްރައިމަރީގައި ސަރަނގު އާދަމް މަނިކު ހުންނެވީ، ރައީސް ނަޝީދާއި އެއްކޮޅަށެވެ. އަދި ރައީސް ނަޝީދަށް އާދަމް މަނިކު ވަރަށް ބޮޑަށް ކެމްޕޭންވެސް ކޮށްދެއްވިއެވެ. އެހެން ނަމަވެސް އިންތިޚާބުން ރައީސް ނަޝީދު ބަލިވެވަޑައިގެންނެވުމަށްފަހުގައި ޕްރައިމަރީގެ ނަތީޖާ ޤަބޫލު ނުކުރައްވައި، އެމަނިކުފާނު އެމްޑީޕީގެ ތެރޭގައި "ފިކުރެއްގެ ދިރުން"ގެ ނަމުގައި އުފެއްދި ވަކިފެކްޝަންގައި އާދަމް މަނިކު ބައިވެރިވެވަޑައި ނުގެން ހުންނެވީ، ހިމޭނުންނެވެ.
Advertisement
މިއަދު ރައީސް ޞާލިޙަށް ތާއީދު ކުރައްވާކަން ހާމަކުރައްވައި ސަރަނގު އާދަމް މަނިކު ރާއްޖޭގެ މީޑިއާތަކަށް މަޢުލޫމާތު ދެއްވަމުން ވިދާޅުވީ، ރައީސް ޞާލިޙާއި ގުޅިވަޑައިގަތީ އެމަނިކުފާނަކީ އެމްޑީޕީގެ އަސާސްތައް ހިފަހައްޓަވާ ބޭފުޅަކަށް ވާތީ ކަމުގައެވެ. އަދި ޕްރައިމަރީގައި ބަލިވުމުން ބަލި ޤަބޫލު ނުކުރައްވައި އުޅުއްވުމަކީ އޭނާ ޤަބޫލުފުޅު ކުރައްވާ ކަމެއް ނޫންކަމުގައިވެސް އާދަމް މަނިކު ވިދާޅުވެފައިވެއެވެ.
ރިޔާސީ ޕްރައިމަރީ ނާކާމިޔާބުވެވަޑައިގެންނެވުމަށްފަހުގައި، ރައީސް ނަޝީދު ގެންދަވަނީ ސިޔާސީ ގޮތުން ރައީސުލްޖުމްހޫރިއްޔާއަށް ޖެއްސުންތައް ކުރައްވަމުންނެވެ.
