އައިސީސީ ކްރިކެޓް ވޯލްޑް ކަޕްގައި އޮސްޓްރޭލިއާއިން ނެދަލޭންޑްސް ބޮޑު ތަފާތަކުން ބަލިކުރިއިރު، ވަން ޑޭ އިންޓަނޭޝަނަލް (އޯޑީއައި) ވޯލްޑް ކަޕެއްގައި އެންމެ އަވަހަށް 100 "ރަން" ކާމިޔާބުކުރި ކުޅުންތެރިއާގެ ޝަރަފު އޮސްޓްރޭލިއާގެ ގްލެން މެކްސްވެލް ހޯދައިފިއެވެ. މެކްސްވެލް 40 ބޯޅައިން ސެންޗަރީއެއް ހަދާ ރިކޯޑު އައުކުރިއިރު، މި ރެކޯޑް ކުރިން އޮތީ ސައުތު އެފްރިކާގެ އައިޑެން މާކްރަމް އަތުގައެވެ. ނަމަވެސް މާކްރަމްއަށް މި ރެކޯޑު ހިފަހައްޓާ މި ލެވުނީ 3 ހަފްތާ ފާއިތުވަންދެނެވެ.

މީގެ އިތުރުން އޮސްޓްރޭލިއާއިން މި މެޗު 309 ރަންގެ ތަފާތަކުން ކާމިޔާބުކުރުން ވެގެންގޮސްފައިމިވަނީ، ފިރިހެނުންގެ ކްރިކެޓް ވޯލްޑް ކަޕެއްގައި މިހާ ތަފާތު ބޮޑު ނަތީޖާއެއް ނެރުނު ފުރަތަމަ ފަހަރަށެވެ.

މިރޭގެ މެޗަށްފަހު، ގްރޫޕްގެ އެންމެ ކުރީގައި އޮތީ އިންޑިއާއެވެ. އޮސްޓްރޭލިއާ އޮތީ 4 ވަނައިގައެވެ.

އައިސީސީ ކްރިކެޓް ވޯލްޑް ކަޕަކީ ކްރިކެޓުގެ އެންމެ ޝަރަފުވެރި މުބާރާތެވެ.  މި މުބާރާތް ކުރިޔަށްދާތާ މިހާރު 50 އަހަރަށް ވުރެ ގިނަ ދުވަސް ވެފައިވާއިރު، މިހާތަނަށް މުބާރާތް ކާމިޔާބުކޮށްފައިވަނީ ތަފާތު 6 ޓީމަކުން އެކަންޏެވެ. މިފަހަރުގެ މުބާރާތް އިންޑިއާގައި ކުރިޔަށްދާއިރު، ޖުމްލަ 10 ސްޓޭޑިއަމްގައި މެޗުތައް ކުޅެއެވެ. އިންޑިއާގައި ހުންނަ އެންމެ ބޮޑު ކްރިކެޓް ސްޓޭޑިއަމް ހުންނަނީ އަހްމަދްއާބާދުގައެވެ. އެ ސްޓޭޑިއަމްގެ ކެޕޭސިޓީއަކީ 132،000 މީހުންނެވެ.